ევროკავშირის უმაღლესი წარმომადგენელი კაია კალასი ევროკომისიის მიერ რუსეთის მოქალაქეებისთვის მულტივიზების გაცემის შეჩერებას გამოეხმაურა და აღნიშნა, რომ რთულია გაამართლო ომის დაწყება და შემდეგ ევროპაში თავისუფალი გადაადგილების მოლოდინი გქონდეს.

„დაიწყო ომი და ევროპაში თავისუფალი გადაადგილების მოლოდინი გქონდეს, რთულია გაამართლო. ევროკავშირი ევროპის მიწაზე დრონების შეჭრისა და საბოტაჟის ფონზე რუსეთის მოქალაქეებისთვის სავიზო წესებს ამკაცრებს. მოგზაურობა ევროპაში არის პრივილეგია, და არა მოცემულობა“, - დაწერა კალასმა სოციალურ ქსელ X-ში.

ცნობისთვის, ევროკომისიამ მიიღო გადაწყვეტილება რუსეთის მოქალაქეებზე მულტივიზები აღარ გასცეს. ამასთან, უკვე მოქმედი მულტივიზები რუსეთის ყველა მოქალაქეს შეუნარჩუნდება.