თბილისის სახელმწიფო უნივერსიტეტის რექტორმა, აკადემიკოსმა ჯაბა სამუშიამ საერთაშორისო სამეცნიერო კონფერენცია: “გლობალიზაციის გამოწვევები ეკონომიკასა და ბიზნესში” გახსნა. საქართველოსა და საზღვარგარეთის ქვეყნების უმაღლესი სასწავლებლებისა და კვლევითი ინსტიტუტების პროფესორ-მასწავლებლებმა და მკვლევრებმა, დარგის სპეციალისტებმა ეკონომიკასა და ბიზნესში მიმდინარე გამოწვევებზე კვლევითი ნაშრომები წარმოადგინეს და საერთასშორისო გამოცდილებაზე ისაუბრეს. 

თბილისის სახელმწიფო უნივერსიტეტის რექტორმა ჯაბა სამუშიამ გლობალიზაციის პროცესში სახელმწიფოების, მათ შორის საქართველოს წინაშე არსებულ გამოწვევებზე ისაუბრა.  „დღეს, როგორც არასდროს, ამ საერთაშორისო კონფერენციის თემა არის ყველაზე მნიშვნელოვანი როგორც საქართველოსთვის, ისე რეგიონისთვის. გლობალიზაციის შესწავლა უნდა დავიწყოთ სწორედ ეკონომიკიდან. ევროინტეგრაციის პროცესში შეიძლება წავაწყდეთ გარკვეულ სირთულეებს, რომელზეც დღესვე უნდა დავიწყოთ ფიქრი. თქვენ ქმნით ეკონომიკურ აზრს ჩვენს სახელმწიფოში და მსოფლიოში, ამიტომ ძალიან მნიშვნელოვანია, მოვისმინოთ როგორც ქართველი, ისე უცხოელი სპეციალისტების მოხსენებები, რომლებიც საკუთარ გამოცდილებას გაგვიზიარებენ“, - განაცხადა ჯაბა სამუშიამ. 

თბილისის სახელმწიფო უნივერსიტეტის ეკონომიკისა და ბიზნესის ფაკულტეტის დეკანის გიორგი ღაღანიძის ინფორმაციით, კონფერენციაში 100-მდე  ქართველი და უცხოელი პროფესორ-მასწავლებელი და მკვლევარი მონაწილეობდა, რომლებმაც 50-ზე მეტი კვლევითი ნაშრომი წარმოადგინეს. „ამ რთულ, ტურბულენტურ ეკონომიკურ გარემოში ჩვენ ვცდილობთ, მოვძებნოთ ახალი გზები და მიდგომები იმისათვის, რომ ჩვენი ქვეყანა განვითარდეს და მის ეკონომიკას ჰქონდეს საკმარისი სტიმული შემდგომი ზრდისათვის“-, აღნიშნა გიორგი ღაღანიძემ. 

მე-9 საერთაშორისო სამეცნიერო კონფერენცია “გლობალიზაციის გამოწვევები ეკონომიკასა და ბიზნესში” თბილისის სახელმწიფო უნივერსიტეტის ეკონომიკისა და ბიზნესის ფაკულტეტის ორგანიზებით გაიმართა.