ირანის ატომური ენერგიის სააგენტოს ცნობით, ისრაელის თავდასხმის შედეგად ირანის მთავარი ბირთვული გამდიდრების ობიექტი, ნატანზი, დაზიანდა. ობიექტში ათასობით ცენტრიფუგაა განთავსებული, რომლებიც ბირთვული ენერგიის მისაღებად ურანის გამდიდრებისთვის გამოიყენება.

,,კომპლექსს როგორც მიწისზედა, ასევე მიწისქვეშა ობიექტები აქვს და გაურკვეველია, რა დაზიანდა. მსხვერპლი არ არის,’’ - ნათქვამია განცხადებაში. 

გაეროს ბირთვული ენერგიის სააგენტოს ხელმძღვანელმა, რაფაელ გროსიმ, განაცხადა, რომ ირანის ხელისუფლებამ დაადასტურა, რომ ნატანზზე „თავდასხმა“ მოხდა, თუმცა რადიაციის მომატებული დონე არ დაფიქსირებულა. გროსიმ ატომური ენერგიის საერთაშორისო სააგენტოს საბჭოს წევრებს განუცხადა, რომ ირანში, ისპაჰანსა და ფორდოუში მდებარე სხვა ბირთვული ობიექტები „არ დაზიანებულა“.