"იქნებ მე ვარ უვარგისი მამა, რატომ უფუჭებთ ბავშვს მომავალს". - წერს რუსული კანონის საწინააღმდეგო აქციებზე პოლიციელზე თავდასხმისა და სხვისი ნივთის დაზიანების ბრალდებით დაკავებული 21 წლის ლაზარე გრიგორიადისის მამა.

გრიგორიადისი გუშინ, 29 მარტს დააკავეს. იმავე დღეს სამთავრობო მედია POSTV-მ გაავრცელა ინფორმაცია, რომ ის წარსულში მამაზე ძალადობის გამო იყო ნასამართლევი.

"ძალიან გთხოვთ, გაავრცელეთ ეს ინფორმაცია.

გამარჯობათ მეგობრებო, დადის ჭორი და მიდის ჩემი შვილის, ლაზარე გრიგორიადისის გაშავების პროცესი, თითქოსდა მე და ჩემს შვილს გვაქვს კონფლიქტი და არ გვაქვს კარგი ურთიერთობები. სანამ ვინმეს შვილს რამეში დაადანაშაულებთ, გირჩევთ გაარკვიოთ და მერე წერეთ და იკითხეთ, და საერთოდ იქნებ მე ვარ უვარგისი მამა... რატომ უფუჭებთ ბავშვს მომავალს, რატომ ტლიკინებთ იქ, სადაც არ გეხებათ. ლაზარე არის ახალი თაობის წარმომადგენელი და ის ფიქრობს თავისებურად, მე ვაფასებ ყველა ახალგაზრდა ადამიანის უფლებებს და სოცმხედველობას. მინდა შევახსენო მთავრობას - ნუ გადაიმტერებთ ახალგაზრდა თაობას. ჩემი მოთხოვნაა, თავისუფლება ყველა უკანონოდ დაკავებულ ადამიანს". - წერს ბექა გრიგორიადისი, დაკავებულის მამა.