ამერიკელმა მილიარდერმა ილონ მასკმა განაცხადა, რომ მას ჩეჩნეთის ლიდერისთვის რამზან კადიროვისთვის Tesla Cybertruck არ უჩუქებია. ამის შესახებ თავად კადიროვი ამბობდა. ინფორმაციას „რია ნოვოსტი“ ავრცელებს.

„იმდენად შტერები ხართ, რომ მართლა გგონიათ, რომ მე რუსეთის გენერალს Cybertruck ვაჩუქე? ეს არის იმის მორიგი მაგალითი, თუ როგორ იტყუება ტრადიციული მედია“, - დაწერა ილონ მასკმა Х-ში.

17 აგვისტოს რამზან კადიროვმა განაცხადა, რომ ილონ მასკმა მას ელექტრომობილი Cybertruck აჩუქა და შესაბამისი ვიდეო გამოაქვეყნა. კადიროვმა მანქანა თავად გამოცადა და განაცხადა, რომ ის ჩეჩენ მებრძოლებს გადაეცემა, რომლებიც უკრაინაში „სპეციალურ სამხედრო ოპერაციაში“ მონაწილეობენ.

ასევე გავრცელდა ინფორმაცია, რომ რამზან კადიროვმა ილონ მასკი გროზნოში დაპატიჟა.