ილონ მასკი ამერიკელებს ურჩევს, აშშ-ის კონგრესის შუალედურ არჩევნებზე „რესპუბლიკელებს“ მისცენ ხმა. შესაბამისი შინაარსის მიმართვა მან „ტვიტერით“ გაავრცელა.

„დამოუკიდებელ ამომრჩევლებს: გაზიარებული ძალაუფლება აკავებს ორივე პარტიის ყველაზე ცუდ ექსცესებს, ამიტომ, მე გირჩევთ ხმა მისცეთ რესპუბლიკურ კონგრესს იმის გათვალისწინებით, რომ პრეზიდენტი დემოკრატია. მყარი „დემოკრატები“ ან „რესპუბლიკელები“ არასდროს აძლევენ ხმას მეორე მხარეს, ამიტომ დამოუკიდებელი ამომრჩევლები არიან ისინი, ვინც სინამდვილეში წყვეტს, ვინ იქნება პასუხისმგებელი“, – წერს ილონ მასკი.

8 ნოემბერს აშშ-ში კონგრესის შუალედური არჩევნები გაიმართება. ამჟამად წარმომადგენელთა პალატასა და სენატს „დემოკრატები“ აკონტროლებენ.