მე ყოველთვის ვიყავი გაკვირვებული, რა ხალხზე დადეს ფსონი ჩვენმა დასავლელმა პარტნიორებმა, უბრალოდ, რატომ დადო და რა კრიტერიუმებით შეარჩია, – ამის შესახებ პარტია „გირჩის“ ერთ-ერთმა ლიდერმა, იაგო ხვიჩიამ საქართველოს პირველი არხის გადაცემაში „აქტუალური თემა მაკა ცინცაძესთან ერთად“ განაცხადა.

ხვიჩიამ უპასუხა გადაცემის წამყვანის შეკითხვას, როგორ შეაფასებს აშშ-ის არმიის გადამდგარი პოლკოვნიკის და 2001-2005 წლებში სახელმწიფო მდივნის ადმინისტრაციის ყოფილი ხელმძღვანელის, ლოურენს უილკერსონის განცხადებას: „ჩვენ ვყიდულობდით გაზეთების რედაქტორებს, გაზეთებს, ტელევიზიებს, ზოგადად, ვყიდულობდით კომუნიკატორებს, არასამთავრობო ორგანიზაციებს ისე, რომ მათ ეს არ იცოდნენ. ჩვენ ეს გავაკეთეთ საქართველოში, ყველგან გავაკეთეთ და ძალიან წარმატებული ვიყავით“.

„მე ზოგადად, „ქართული ოცნების“ პროპაგანდის ნაწილი მგონია, მაგრამ, რაც არ უნდა პროპაგანდა იყოს, ის ნაწილი, რომ მართლა ძალიან ეგზოტიკურ ხალხზე დადეს ფსონი ჩვენმა დასავლელმა პარტნიორებმა საქართველოში, ეს მე მგონი, ისედაც ცხადი იყო. ამიტომ მგონია, რომ ჩვენ დისკუსიები, თავისუფალი მედია და ასე შემდეგ, რაც ამ ფორმატში, როგორც ამერიკული და დასავლური ღირებულება შემოვიდა, სწორედ იმიტომ გჭირდებოდა, რომ ეს ამბები გაგვერჩია საჯაროდ, მართლა რა ღირებულებაა დასავლეთისთვის ნამდვილი ღირებულება, ჩვენ რა გვინდა, საით მივდივართ და ის ხალხი, რომელზეც დასავლეთმა ფსონი დადო საქართველოში, იმათ სადღაც ხომ უნდა ელაპარაკათ, რაღაც ხომ უნდა გაევრცელებინათ და ვფიქრობ, შეიძლება, მოსყიდულები იყვნენ, შეიძლება – არა, მაგრამ ვერ გაამართლა ამ ხალხმა იმედები“, – განაცხადა ხვიჩიამ.

მისი თქმით, მთელი პრობლემები 90-იანი წლებიდან იწყება, მაშინ ყალიბდება ჩვენი ე.წ. ენჯეოსექტორი და მის მერე უცვლელად მოდის.

„შესაბამისად, მე მგონი, მაშინ ხომ ვიღაცებზე ფსონი დადეს ვიღაცებმა და ეს ფსონი ძალიან უცნაურად დადებული ფსონი აღმოჩნდა. თანამედროვე რეალობაში შეუძლებელი იყო, ამ ხალხს რამე ექნა. ეს ხალხი შეიძლება, უბრალოდ, ინარჩუნებდა თავის ადგილს, რომ მე აქ წარმოვადგენდე ამერიკას, ევროპას საქართველოში, მაგრამ საბოლოო ჯამში, მე არსად არ მინახავს დისკუსიები ქართულ საზოგადოებაში იმასთან დაკავშირებით, თუ რა არის ევროპა, აშშ. ერთპიროვნული მმართველობა, რომელიც საქართველოში სულ მოდაში იყო, პირობითად, ეს არის დასავლეთი? საკუთრების დაცვა, როგორც დასავლეთშია, ჩვენ ისეთი გვქონდა? სასამართლო ისეთი გვქონდა? ამიტომ, მე არ გამოვრიცხავ, რომ ვიღაცას ისყიდიდნენ, ან არ ისყიდიდნენ, მაგრამ ძალიან მაკვირვებს, რატომ ისყიდიდნენ ასეთ უცნაურ ხალხს“, – განაცხადა ხვიჩიამ.

მაკა ცინცაძის შეკითხვაზე, ამყარებს თუ არა ამგვარი განცხადებები, თუნდაც იგივე ხელისუფლების პოზიციას იმ თვალსაზრისით და იმ კონტექსტში, რომ გარედან ხდებოდა ჩარევები შიდა პოლიტიკურ პროცესებში, იაგო ხვიჩიამ განაცხადა, რომ არ იცის, ეს კონკრეტული განცხადება რა ღირებულებას შეიძლება, შეიცავდეს, რადგან არ იცის განმცხადებულის ბიოგრაფია, მისი კავშირი ზოგადად ასეთ საქმიანობასთან, მის მიერ მოყვანილი მტკიცებულებები და ასე შემდეგ.

ამასთან, იაგო ხვიჩიას წამყვანმა ასევე შეაფასებინა მარკო რუბიოს განცხადება არასამთავრობო ორგანიზაციებზე, სადაც ის ამბობს: „ჩვენ თუ ვცდილობთ ქვეყნების დახმარებას, დავეხმაროთ ქვეყნებს, ნუ დავეხმარებით არასამთავრობო ორგანიზაციას, რომ შევიდეს ქვეყანაში და იპოვოს ბიზნესის ახალი ხაზი. არ ვაპირებთ მილიარდობით დოლარის დახარჯვას არასამთავრობო ორგანიზაციების ინდუსტრიული კომპლექსის დაფინანსებაზე“.

კითხვაზე, არის თუ არა ეს განცხადება ერთგვარი დასტური იმისა, რომ არასამთავრობო ორგანიზაციები ფინანსებს და დაფინანსებას არამიზნობრივად იყენებდნენ, ხვიჩიამ აღნიშნა, რომ არ იცის.

„არ ვიცი, ამ ფულის პატრონი მე არა ვარ, ფულის პატრონი არიან სხვები და შესაბამისად, ისინი განსაზღვრავენ მის მიზნობრიობას. მე არ ვიცი, ვინმე არამიზნობრივად იყენებდა თუ არა, ეს უნდა განსაზღვროს იმან, ვინც ფულს აძლევს. ის უსაზღვრავს ამის მიზანსაც, მაგრამ ვფიქრობ, მარკო რუბიოს განცხადებაც და ეს ბოლო პერიოდის ამერიკული პოლიტიკაც იქითკენ მიდის, რომ ისინი რაღაცნაირად სთხოვენ ევროპას, მიხედეთ საკუთარ თავს სამხედრო თვალსაზრისით, ამის უნარი შეგწევდეთ და მეორე, სწორ გზაზე დაბრუნდითო. ევროპის ქვეყნებმა ხშირ შემთხვევაში, მართლა უღალატეს იმ ღირებულებებს, რომელზეც თავისუფალი დასავლეთი იდგა ზოგადად, ეს არის თავისუფალი ვაჭრობა, თავისუფალი მიმოსვლა, საკუთრების უფლების დაცვა, რაზეც იდგა ზოგადად დასავლური ცივილიზაცია“, – განაცხადა ხვიჩიამ.