10 დეკემბერს, ესპანეთის ლა ლიგის თამაში მას შემდეგ გადაიდო, რაც გულშემატკივარი გულის გაჩერების შედეგად გარდაიცვალა.

თამაშის მე-15 წუთზე ატლეტიკის მეკარემ უნაი სიმონმა მსაჯს აცნობა, რომ ერთ-ერთ გულშემატკივარს სასწრაფო დახმარება სჭირდებოდა. მე-17 წუთზე კი თამაში შეჩერდა, როდესაც ექიმებმა გულშემატკივრის გონზე მოყვანის მცდელობა დაიწყეს.

მომხდარიდან მალევე ორივე გუნდმა განცხადება გაავრცელა, რომელშიც გარდაცვლილის ოჯახს მიუსამძიმრეს. ლა ლიგის თქმით, გუნდებს შორის შეხვედრის გაგრძელების თარიღს მალე გამოაცხადებდნენ.