ღაზას სექტორზე ისრაელის მიერ განხორციელებული საჰაერო თავდასხმების შედეგად, სულ მცირე, 13 პალესტინელი, მათ შორის, დაჯგუფება „ისლამური ჯიჰადის“ 3 მეთაური, დაიღუპა.
პალესტინის ჯანდაცვის ოფიციალური პირის განცხადებით, დაღუპულთა შორის 6 ქალი და 4 ბავშვია. დაშავდა 20 ადამიანი. ისრაელის ხელისუფლების განცხადებით, დაწყებულია ოპერაცია, რომლის სამიზნესაც ბოევიკები წარმოადგენენ.
„ისლამურმა ჯიჰადმა“ პირობა დადო, რომ ღაზას სექტორში მყოფი მებრძოლები ისრაელის საჰაერო დარტყმების გამო შურს იძიებენ.
გავრცელებული ინფორმაციით, ისრაელის ოფიციალური პირები რამდენიმედღიანი ბრძოლისთვის ემზადებიან. 
„ნებისმიერი ტერორისტი, რომელიც ზიანს მიაყენებს ისრაელის მოქალაქეებს, დაუსჯელი არ დარჩება“, - განაცხადა ისრაელის თავდაცვის მინისტრმა იოავ გალანტმა.