„ქართული ოცნების“ წევრის, მამუკა მდინარაძის განცხადებით, შოვში, სტიქიის ზონაშიო სამუშაოები გრძელდება და დაღუპულებთან დაკავშირებით მონაცემები არ შეცვლილა. მამუკა მდინარაძემ სტიქიის შედეგად დაღუპულთა ოჯახებს კიდევ ერთხელ მიუსამძიმრა.

„დილის შემდეგ დაკარგული ადამიანების აღმოჩენის შესახებ ახალი ინფორმაცია არ არის. იძებნება 16 ადამიანი, ხოლო 18 აღმოჩენილი ცხედრიდან ოთხის იდენტიფიცირება ჯერ ვერ ხერხდება, დანარჩენი იდენტიფიცირებული არიან. ზოგიერთი მათგანი უკვე გადასვენებულია. დღეს გლოვის დღეა და კიდევ ერთხელ ვუცხადებ ძალიან გულწრფელ სამძიმარს თითოეულ ოჯახს. წარმოუდგენელი ამბავია, როცა დაკარგულია ოჯახის რამდენიმე წევრი და მათ ეძებენ. წარმოუდგენელი ტრაგედიაა. აქ როცა ამბებს ისმენ, თავიანთი ოჯახების ამბებს გიყვებიან, არ შეიძლება, ეს მარტივად გადმოსცე სიტყვებით. თითოეულ ოჯახს და მთელ საქართველოს გულწრფელად თანავუგრძნობ“, – განაცხად მამუკა მდინარაძემ.

მამუკა მდინარაძეს კითხვით მიმართეს, როგორ შეაფასებდა და რას ემსახურება ის, რომ სტიქიის დაწყების დღიდან სოციალურ ქსელში „ქართული ოცნების“ ლიდერების მიმართ სხვადასხვა დაუზუსტებელი ინფორმაცია ვრცელდება. მამუკა მდინარაძის თქმით, ტრაგედიის ფონზე, გარკვეული ადამიანების მხრიდან განცხადებების გაყალბება ხდება, რაც ამ გამაოგნებელია.

„გამაოგნებელია, როცა ასეთი ტრაგედიის მიუხედავად, ასეთი ტრაგედიის ფონზე ვიღაცები ახერხებენ და იცლიან იმისთვის, რომ დასხდნენ და „ფეიკები“ აკეთონ. ბოლო პერიოდში არაერთ ადამიანთან, პოლიტიკოსთან დაკავშირებით სოციალური ქსელი გაჯერებულია მოგონილი ამბებით, განსაკუთრებით კახა კალაძეზე და ირაკლი კობახიძეზე. რასაკვირველია ჩვენზეც, ყველაზე. ადამიანები ახერხებენ, მორალი აძლევთ იმის საშუალებას, რომ რისი მსგავსი განცახადებებიც არ გაკეთებულა, ასეთ განცხადებები გაავრცელონ. განცხადებებს აყალბებენ და ამით საზოგადოებას აბრაზებენ. სამწუხაროდ, შემდეგ ამას ვიღაცები იჯერებენ. არაერთი გაზიარება ჰქონდა ერთ-ერთ ასეთ „ფეიკს“. როგორც მეუბნებიან, დაზარალებული ოჯახის ერთ-ერთმა წევრმა გააზიარა. ხომ შეიძლება, ცოტა ხანს გაჩერდნენ და გლოვის დღეს, ასეთი უბედურების დღეებში ოპონენტის პოლიტიკურ დაზიანებაზე არ იფიქრონ, ამით არ იყვნენ დაკავებული. მოვუწოდებ ყველას, ამ უბედურების, ტრაგედიის ირგვლივ მაინც შევძლოთ გაერთიანება და არავის არაფერი დააბრალონ. სიცრუის ტირაჟირებასაც როცა არ ერიდებიან, ეს უკვე ამაზრზენია“, – განაცხადა მამუკა მდინარაძემ.