გერმანიის კანცლერი ფრიდრიხ მერცი ვარაუდობს, რომ აშშ „როსნეფტის“ გერმანულ განყოფილებას სანქციებისგან გაათავისუფლებს.

მისი თქმით, საკითხი ამერიკელებთან განიხილება. 

„ამ საკითხს ამერიკელებთან განვიხილავთ. ვვარაუდობ, რომ „როსნეფტი“ გათავისუფლდება სანქციებიდან“, – განაცხადა მერცმა ბრიუსელში, ევროკავშირის სამიტის შემდეგ გამართულ პრესკონფერენციაზე.

„როსნეფტის“ გერმანულ ბიზნესს გერმანიის ხელისუფლება აკონტროლებს, მაგრამ ის რუსეთის საკუთრებაა.

შეგახსენებთ, გუშინ აშშ-ის სახაზინო დეპარტამენტმა რუსეთის ორ უმსხვილეს ნავთობკომპანიას, „როსნეფტსა“ და „ლუკოილს“ სანქციები დაუწესა. ახალი სანქციები მიზნად ისახავს რუსეთის ენერგეტიკულ სექტორზე ზეწოლის გაზრდას და კრემლის შესაძლებლობების შეზღუდვას, რომ ომის გასაგრძელებლად შემოსავალი მიიღოს.