აშშ-ის ფედერალური გამოძიების ბიუროს ხელმძღვანელმა, კაშ პატელმა სამსახურის საიდუმლო ოთახში ტრამპ-რუსეთის გამოძიების ათასობით დოკუმენტი აღმოაჩინა. ინფორმაციას ამის შესახებ „ფოქს ნიუსი“ ავრცელებს.

მედიის ინფორმაციით, საიდუმლო დოკუმენტები „დასაწვავ ტომრებში“ იყო განთავსებული. წყაროებმა „ფოქს ნიუსს“ განუცხადეს, რომ „დასაწვავი ტომრის“ სისტემა გამოიყენება საიდუმლო ან უფრო მაღალი ხარისხის დოკუმენტების გასანადგურებლად. ერთ-ერთი დოკუმენტი, რომელიც იპოვეს, ყოფილი სპეციალური პროკურორის, ჯონ დარემის საბოლოო ანგარიშის საიდუმლო დანართი იყო, რომელიც მოიცავს მის მიერ განხილულ სადაზვერვო მონაცემებს. გასაიდუმლოებული დანართი გადაეცემა სენატის იურიდიული კომიტეტის თავმჯდომარეს, ჩაკ გრასლის, რომელიც საბოლოოდ დოკუმენტს საზოგადოებისთვის გაასაჯაროებს.

„ფოქს ნიუსს“ მიაწოდეს ინფორმაცია გასაიდუმლოებული დანართის ზოგიერთი მონაკვეთის შინაარსის შესახებ, მათ შორის იმის შესახებ, რომ აშშ-ის სადაზვერვო სამსახურს ჰქონდა სანდო უცხოური წყაროები, რომლებიც მიუთითებდნენ, რომ გამოძიების ფედერალური ბიურო გარკვეულ როლს ითამაშებდა ტრამპსა და რუსეთს შორის სავარაუდო შეთქმულების ნარატივის გავრცელებაში, ვიდრე ბიურო დაიწყებდა Crossfire Hurricane-ის საკამათო გამოძიებას.

„საბოლოო ჯამში, საიდუმლო დანართის გამოქვეყნება კიდევ უფრო დამაჯერებელს გახდის იმ მტკიცებას, რომ აშშ-ის მთავრობაში არსებობდა კოორდინირებული გეგმა, რათა კლინტონის საარჩევნო შტაბს დახმარებოდნენ ტრამპის რუსეთთან კავშირთან დაკავშირებული სკანდალის გაღვივებაში. ამ სადაზვერვო ინფორმაციის შეგროვებიდან სულ რაღაც რამდენიმე დღეში გამოძიების ფედერალურმა ბიურომ დაიწყო Crossfire Hurricane-ი. ნამდვილად ძნელი წარმოსადგენია, თუ როგორ შეძლებენ ბრენანი, კლეპერი და კომი ამის ახსნას“, – განუცხადა წყარომ „ფოქს ნიუსს“.

კაშ პატელმა ივნისში პოდკასტის წამყვანთან, ჯო როგანთან ინტერვიუში გაამხილა, რომ მან იპოვა ოთახი, რომელიც სავსე იყო დოკუმენტებითა და კომპიუტერის მყარი დისკებით, რომლებიც არავის უნახავს და მათ შესახებ არც სმენია. 2016 წლის ივლისში, საარჩევნო ციკლის დროს გამოძიების ფედერალურმა ბიურომ დაიწყო გამოძიება, თანამშრომლობდა თუ არა ტრამპის საარჩევნო შტაბი რუსეთთან არჩევნების შედეგებზე გავლენის მოხდენის მიზნით. ეს გამოძიება ბიუროს შიგნით ცნობილი იყო როგორც Crossfire Hurricane-ი. კაშ პატელმა, როგორც მთავარმა გამომძიებელმა, 2018 წლის თებერვლისთვის აღმოაჩინა მთავრობის მიერ ფარული თვალთვალის ფართოდ გავრცელებული დარღვევები, მათ შორის ტრამპის საარჩევნო შტაბის ყოფილი თანაშემწის, კარტერ პეიჯის სავარაუდო არასათანადო თვალთვალი.