FARA-ს კანონი დემოკრატიასთან შეუსაბამო თუ იყო, რატომ გაახსენდათ მაშინ, როცა საქართველოში მისი სიტყვა-სიტყვით გადმოთარგმნილი ასლი მივიღეთ?, – ამის შესახებ საქართველოს პარლამენტის იურიდიულ საკითხთა კომიტეტის თავმჯდომარე არჩილ გორდულაძემ განაცხადა.

გორდულაძეს კითხვა დაუსვეს ეუთო-ს დემოკრატიული ინსტიტუტებისა და ადამიანის უფლებების ოფისის (ODIHR) განცხადებაზე, სადაც ODIHR-ი მოუწოდებს ხელისუფლებას, გადახედოს „უცხოური აგენტების რეგისტრაციის აქტის“ განხორციელებას და საკანონმდებლო ბაზის გაუმჯობესებაში დახმარებისთვის მზადყოფნას გამოთქვამს.

„როგორც აღმოჩნდა, ეუთო\ოდირი ამერიკის შეერთებულ შტატებს აკრიტიკებს და აშშ-ში მოქმედ კანონმდებლობას, FARA-ს იწუნებს. ამბობენ, რომ ეს კანონი დემოკრატიასთან შეუსაბამოა. ეს კანონი თუ დემოკრატიასთან შეუსაბამო იყო, რატომ გაახსენდათ მაშინ, როცა საქართველოში მისი სიტყვა-სიტყვით გადმოთარგმნილი ასლი მივიღეთ? თურმე ეს საქართველოში პრობლემას ქმნის და აშშ-ში პრობლემას არ წარმოადგენს. ერთი მხრივ, ამ ადამიანებს კარგად არ აქვთ გააზრებული, ხოლო, მეორე მხრივ, ისევ „დიფ სთეითის“ გავლენებიდან გამომდინარე აქვთ სურვილი, ჩვენს ქვეყანაში მტრის ხატი დახატონ ან შექმნან მოცემულობა, რომ ისევ ფეიქნიუსები გაავრცელონ კონკრეტულ კანონთან დაკავშირებით, რომელიც აშშ-ში 30-იანი წლებიდან მოყოლებული მოქმედებს, იცავს მის სუვერენიტეტს და არ აქვს პრობლემა დემოკრატიასთან. როგორც ჩანს, უნდა აღმოჩნდეს, რომ საქართველოში დემოკრატიის საფუძვლებთან წინააღმდეგობაშია. ქართული საზოგადოებისთვის ამ მარტივი ტყუილის გაყიდვას ცდილობენ. ამათ არაფერი შეეშალოთ – ქართული საზოგადოება არ არის ისეთი, რომელსაც არ შეუძლია, მიიღოს ინფორმაცია, გაანალიზოს და ამ უსამართლობის მიმართ თავისი დამოკიდებულება ჰქონდეს“, – განაცხადა არჩილ გორდულაძემ.