გამოცემა ხაზს უსვამს, რომ ევროკომისიაში დებატების დაწყებას წინ უძღოდა ევროკომისიის პრეზიდენტ ურზულა ფონ დერ ლაიენის ვიზიტი კიევში, სადაც პრეზიდენტმა ზელენსკიმ და სხვა ოფიციალურმა პირებმა ითხოვეს უკრაინისთვის ოფიციალური სტატუსის მინიჭება, რასაც, მათი განცხადებით, ომში მყოფი ქვეყნისთვის მორალური თვალსაზრისით დიდი მნიშვნელობა ექნება. ამასთან, უკრაინის ხელისუფლების წარმომადგენლები აღნიშნავდნენ, რომ 2013-2014 წლებში, მაიდანის რევოლუციის დროს, უკრაინელებმა ევროკავშირში ინტეგრაციისთვის სისხლი დაღვარეს.

Politico-ს წყაროთა თანახმად, ევროკომისიაში კარგად ესმით უკრაინელების მიერ გაღებული მსხვერპლი და ისიც, რომ რუსეთის პრეზიდენტს უნდა გაეგზავნოს ძლიერი სიგნალი იმის თაობაზე, რომ დაკარგა საკუთარი გავლენის სფეროში უკრაინის დაბრუნების ნებისმიერი შანსი.

ევროკომისია რეკომენდაციებს ამ კვირის ბოლოსთვის შეიმუშავებს, საბოლოო გადაწყვეტილებას კი, მომავალ კვირაში მიიღებენ ევროკავშირის წევრი სახელმწიფოების ლიდერები. როგორც Politico წერს, სულ მცირე სამი ქვეყანა ისევ ეწინააღმდეგება უკრაინისთვის სტატუსის მინიჭებას. გამოცემა ხაზს უსვამს, რომ ბოლო ხანს, არაერთმა ლიდერმა, მათ შორის საფრანგეთის პრეზიდენტმა მაკრონმა განაცხადა, რომ უფრო სასარგებლო იქნებოდა უკრაინისთვის დროებითი სტატუსის მინიჭება. ამჟამად სწორედ საფრანგეთის პრეზიდენტია ევროკავშირის წევრი სახელმწიფოების ლიდერთა საბჭოს თავმჯდომარე.

რაც შეეხება საქართველოს და მოლდოვას, Politico-ს წყაროთა თანახმად, ევროკომისია, საერთო ჯამში, მხარს უჭერს სტატუსის მინიჭებას მოლდოვისთვის, რომელსაც მტკიცედ პროევროპული მთავრობა ჰყავს და ნაკლებად დარწმუნებულია საქართველოზე, რომელიც ბოლო წლებში განიცდის პოლიტიკურ რყევებს და დემოკრატიიდან შესამჩნევ უკან დახევას.

„რადიო თავისუფლება“