ევროკავშირის უმაღლესი წარმომადგენელი კაია კალასი და ევროკომისარი მარტა კოსი საქართველოს პარლამენტის მიერ მიღებულ ახალ კანონებს ეხმიანებიან, მათ შორის „უცხოელი აგენტების რეგისტრაციის აქტს“ და „კანონს მაუწყებლობის შესახებ“.
როგორც განცხადებაშია ნათქვამი, მიღებული კანონები ქვეყნის ხელისუფლებას აძლევს დამატებით ინსტრუმენტებს განსხვავებული აზრის ჩასახშობად და რეპრესიების პოლიტიკის გასამკაცრებლად.
„პარლამენტის მიერ სათანადო საჯარო კონსულტაციების გარეშე მიღებული ახალი კანონმდებლობა, მათ შორის „უცხოელი აგენტების რეგისტრაციის აქტი“ და „კანონი მაუწყებლობის შესახებ“, საქართველოს ხელისუფლებას აძლევს დამატებით ინსტრუმენტებს განსხვავებული აზრის ჩასახშობად და რეპრესიების პოლიტიკის გასამკაცრებლად. ეს კანონები ქმნის სამოქალაქო აქტივისტების მუშაობის სტიგმატიზების, სამოქალაქო საზოგადოებისა და დამოუკიდებელი მედიის გადარჩენისთვის საფრთხის, ადამიანის უფლებების დაცვის მხრივ უკუსვლის, ფუნდამენტური თავისუფლებებს არასათანადო შეზღუდვის და დემოკრატიული გადაწყვეტილებების მიღების ძირის გამოთხრის რისკს.
ეს ნაბიჯები კიდევ უფრო მეტად აზიანებს საქართველოში დემოკრატიის საფუძვლებს. ასეთი ქმედებები ფუნდამენტურად შეუთავსებელია ევროკავშირის დემოკრატიის, კანონის უზენაესობისა და მედიის პლურალიზმის ღირებულებებთან და შორს არის იმისგან, რასაც კანდიდატი ქვეყნისგან მოველოდით. ისინი უარყოფითად იმოქმედებენ ევროკავშირისკენ საქართველოს გზაზე. ევროკავშირის ამ ღირებულებების დაცვა მოლაპარაკებებს არ ექვემდებარება.
ქართველი ხალხის აბსოლუტურ უმრავლესობას სურს საქართველოს გაწევრიანება ევროკავშირში. ჩვენ მოვუწოდებთ ხელისუფლებას, გამოავლინონ ნამდვილი და შეუქცევადი ერთგულება ევროკავშირის გზაზე დაბრუნებისადმი. ეს მოითხოვს მოქალაქეების მიმართ ძალადობის შეჩერებას, უსამართლოდ დაკავებულთა გათავისუფლებას, რეპრესიული კანონების შეჩერებას, ვენეციის კომისიასთან კონსულტაციებს და შინაარსიან დიალოგს სამოქალაქო საზოგადოებასა და ყველა პოლიტიკურ აქტორთან არსებული კრიზისიდან გამოსავლის მოსაძებნად.
საქართველოს დაბრუნება ევროკავშირში გაწევრიანების გზაზე მთლიანად ქვეყნის ხელისუფლების ხელშია.
ევროკავშირი კვლავ მზადაა, მხარი დაუჭიროს ქართველი ხალხის ევროპულ მისწრაფებებს და ყველა ძალისხმევას, რომელიც მიმართულია საქართველოს დემოკრატიული, სტაბილური და ევროპული მომავლისკენ“, – ნათქვამია განცხადებაში.
0
0
