ევროკავშირის სასამართლომ დაადგინა, რომ ევროკომისიამ კორონავირუსის პანდემიის დროს ვაქცინების შესასყიდად გაფორმებული კონტრაქტების საჯაროობა არ უზრუნველყო. ინფორმაციას ამის შესახებ Reuters-ი ავრცელებს.

საქმე ეხება 2020 – 2021 წლებში ევროკომისიის მიერ გაფორმებულ კონტრაქტებს. სარჩელის ავტორები ევროპარლამენტის კანონმდებლები იყვნენ. როგორც Reuters-ი იუწყება, ევროპარლამენტს გაფორმებული კონტრაქტების შესწავლა სურდა, თუმცა ევროკომისიამ დეპუტატებს დოკუმენტების ნაწილი საერთოდ არ გადასცა, ხოლო ნაწილი - დარედაქტირებული სახით. ევროკომისიამ ეს კომერციული ინტერესების დაცვით ახსნა.

ამის გამო ევროპარლამენტარებმა ევროკომისიას სასამართლოში უჩივლეს. სასამართლომ მიუთითა, რომ ევროკომისიას უფრო მეტი ინფორმაციის გაცემა შეეძლო ისე, რომ კომერციული ინტერესი არ დაზარალებულიყო.