ევროკავშირის საგარეო საქმეთა მინისტრები იანვრის ბოლოს შეხვდებიან სირიის წინააღმდეგ დაწესებული სანქციების მოხსნის საკითხის განსახილველად. ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, კაია კალასმა ერ-რიადში მიმავალ გზაზე განაცხადა, სადაც სირიის შესახებ რეგიონული კონფერენცია გაიმართება.

„ჩვენ ვიმუშავებთ, რომ იმ დროისთვის შევძლოთ ამ საკითხზე ფაქტობრივი გადაწყვეტილების მიღება“, – განაცხადა კაია კალასმა.

შეგახსენებთ, სირიაში ბაშარ ალ ასადის რეჟიმი ამბოხებულებმა 8 დეკემბერს დაამხეს. მოგვიანებით ცნობილი გახდა, რომ თავად ასადი და მისი ოჯახის წევრები მოსკოვში იმყოფებიან, სადაც მათ თავშესაფარი მიიღეს.