ყაზახეთის პრეზიდენტ კასიმ-ჟომარტ ტოკაევსა და საქართველოს პრემიერ-მინისტრ ირაკლი კობახიძეს შორის, ასტანაში გამართული მოლაპარაკებების შემდეგ, ყაზახეთი, საქართველოსთან სტრატეგიული კავშირების გაღრმავების ფარგლებში, ბაქო-თბილისი-ჯეიჰანის (BTC) მილსადენის მეშვეობით, ნავთობის ექსპორტის გაზრდას გეგმავს, - ამის შესახებ Euronews-ი წერს.

მედიის ინფორმაციით, განცხადება გაკეთდა იმ ფონზე, როდესაც ყაზახეთი აგრძელებს თავისი საექსპორტო მარშრუტების დივერსიფიცირებას ტრანსკასპიური საერთაშორისო სატრანსპორტო მარშრუტის (TITR) მეშვეობით, რომელიც ასევე ცნობილია როგორც შუა დერეფანი.

როგორც Euronews-ი წერს, ამ მარშრუტზე სატრანზიტო მოძრაობის მოცულობა ბოლო ხუთი წლის განმავლობაში თითქმის ოთხჯერ გაიზარდა. 2029 წლისთვის, ყაზახეთი ვარაუდობს, რომ ყოველწლიურად 3000-მდე კონტეინერმზიდი მატარებელი იმოძრავებს ჩინეთსა და ევროპას შორის დამაკავშირებელი კორიდორის გასწვრივ - ყაზახეთის, კასპიის ზღვის, აზერბაიჯანისა და საქართველოს გავლით.

"ჩვენ ვგეგმავთ ნავთობის მიწოდების გაზრდას ბაქო-თბილისი-ჯეიჰანის მილსადენის მეშვეობით. სავაჭრო-ეკონომიკური თანამშრომლობის მთავრობათაშორისი კომისიის ფარგლებში მუშაობა უკვე მიმდინარეობს და იმედი მაქვს, რომ დღევანდელი შეხვედრა ხელს შეუწყობს მომავლის ახალი პრიორიტეტების განსაზღვრას", - ციტირებს მედია ტოკაევის განცხადებას.