ევროკავშირის საგარეო პოლიტიკის ხელმძღვანელმა, კაია კალასმა პარლამენტარებთან კერძო საუბრისას განაცხადა, რომ მსოფლიოში არსებული მდგომარეობა შესაძლოა ნიშნავდეს იმას, რომ ახლა ალკოჰოლის მიღების დაწყების „შესაფერისი მომენტია“.- წერს POLITICO

ოთახში მყოფი ორი პირის თქმით, კალასმა ევროპარლამენტის პოლიტიკური ჯგუფების ლიდერებს განუცხადა, რომ მიუხედავად იმისა, რომ ის ალკოჰოლს არ იყენებს  ბოროტად, ახლა, მსოფლიო მოვლენების გათვალისწინებით, შესაძლოა დადგა დრო, რომ დაიწყოს.

მან ეს განცხადება დაახლოებით იმავე დროს გააკეთა, როდესაც გრენლანდიისა და დანიის საგარეო საქმეთა მინისტრები აშშ-ის ვიცე-პრეზიდენტს, ჯეი დი ვენსს და სახელმწიფო მდივანს, მარკო რუბიოს ხვდებოდნენ დონალდ ტრამპის მუქარებთან დაკავშირებით არქტიკული კუნძულის ხელში ჩაგდების თაობაზე.

ევროკავშირის მთავარმა დიპლომატმა, რომელიც ბლოკის საგარეო პოლიტიკას 27 ქვეყნის მთავრობისა და ევროკომისიის სახელით კოორდინირებს, „თავმჯდომარეთა კონფერენციაზე“ (პარლამენტის ჯგუფების ლიდერების შეხვედრა) იხუმრა. მისი კომენტარები მას შემდეგ გაჟღერდა, რაც ევროპარლამენტის წამყვანმა დეპუტატებმა ერთმანეთს ახალი წელი მიულოცეს. შეხვედრის მონაწილეთა თქმით, იმავე დეპუტატებმა დაამატეს, რომ გლობალურმა მოვლენებმა ეს წელი მაინცდამაინც სასიხარულო არ გახადა.

ევროპაში არსებული შიშების ფონზე — ტრამპის მიერ გრენლანდიის შესაძლო ანექსიის, ირანის ისლამისტური რეჟიმის წინააღმდეგ მასობრივი პროტესტების, ასევე უკრაინასა და ღაზის სექტორში მიმდინარე კონფლიქტებისა და ვენესუელაში აშშ-ის ოპერაციის გამო — გეოპოლიტიკა ევროკავშირისთვის ყველაზე აქტუალური პრობლემა გახდა.

კალასის ერთ-ერთი ბოლო ნაბიჯი იყო POLITICO-სთვის მიცემული განცხადება ირანის წინააღმდეგ ახალი სანქციების შეთავაზების მზადყოფნის შესახებ, მას შემდეგ რაც მთავრობამ პროტესტი ჩაახშო, რასაც, გავრცელებული ინფორმაციით, ასობით ადამიანის სიცოცხლე ემსხვერპლა.