აშშ-ის პრეზიდენტი დონალდ ტრამპი აცხადებს, რომ ეწინააღმდეგება უკრაინის მიერ მოსკოვზე თავდასხმების იდეას.

ამის შესახებ დღეს ტრამპმა ჟურნალისტებთან ისაუბრა.

ჟურნალისტის კითხვაზე, „უნდა იყოს თუ არა ზელენსკი აგრესიული“, ტრამპმა უპასუხა: „არა, მან არ უნდა დაუმიზნოს მოსკოვს“.

დონალდ ტრამპმა ასევე უარყო უკრაინისთვის შორ მანძილზე მოქმედი იარაღის გაგზავნის განზრახვები: „არა, ჩვენ ამას არ ვაპირებთ“, – აღნიშნა ამერიკის პრეზიდენტმა.

აშშ-ის პრეზიდენტმა კიდევ ერთხელ განაცხადა, რომ ვლადიმერ პუტინით იმედგაცრუებულია.

„ვნახავ, რა მოხდება პრეზიდენტ პუტინთან. 50 დღის შემდეგ თუ შეთანხმება არ იქნება, ეს ძალიან ცუდი იქნება. ტარიფები შემოვა და სხვა სანქციებიც“, – განაცხადა ტრამპმა.

ჟურნალისტის კითხვაზე, რატომ აძლევს პუტინს კიდევ 50 დღეს უკრაინის წინააღმდეგ ომის გაგრძელებისთვის, ტრამპმა უპასუხა: „არ ვფიქრობ, 50 დღე ბევრია. შეიძლება, უფრო ადრეც მოხდეს“.

ამასთან, კითხვაზე, იცავს თუ არა დონალდ ტრამპი ახლა უკრაინის მხარეს, აშშ-ის პრეზიდენტმა უპასუხა: „მე არავის მხარეს არ ვარ“. ტრამპის განმარტებით, ის „კაცობრიობის მხარეს არის“.