უკრაინის ქალაქ დნიპროში ცხრასართულიან საცხოვრებელ კორპუსზე სარაკეტო თავდასხმის ადგილზე სამაშველო სამუშაოები კვლავ გრძელდება. 

ბოლო ინფორმაციით, რუსულ თავდასხმას სულ მცირე 40 ადამიანის, მათ შორის 3 ბავშვის, სიცოცხლე ემსხვერპლა.

მაშველებმა 39 ადამიანის გადარჩენა მოახერხეს. შემთხვევის შედეგად სულ მცირე 75 მოქალაქე დაშავდა. 

გარდა ამისა, ტრაგედიის ადგილზე აღმოაჩინეს ადამიანის სხეულის ფრაგმენტები, რომლებიც ექსპერტებს იდენტიფიკაციისთვის გადაეცათ.

შეგახსენებთ, რუსებმა 14 იანვარს დნიპროში მდებარე საცხოვრებელ კორპუსს „X-22“ რაკეტით დაარტყეს.