დიდთოვლობას მსხვერპლი მოჰყვა გურიაში, ოზურგეთის მუნიციპალიტეტის სოფელ კონჭკათში გარდაცვლილია 60 წლამდე მამაკაცი. ეს ინფორმაცია მედიას გურიის სახელმწიფო რწმუნებულმა გიორგი ურუშაძემ დაუდასტურა. მომხდარზე დეტალებს შესაბამისი ორგანოები სწავლიან. დიდთოვლობის გამო ოზურგეთის მუნიციპალიტეტში მე-4 დღეა ოზურგეთის მერია და ყველა შესაბამისი სამსახური საგანგებო რეჟიმში მუშაობს. მთელი ღამის განმავლობაში ოზურგეთის მუნიციპალიტეტის სოფელ დვაბზუს, ნატანების, ლიხაურის, დაბა ლაითურისა და დაბა ურეკის ადმინისტრაციული ერთეულებში მძიმე ტექნიკა იყო მობილიზებული.
თოვლის მაღალმა საფარმა ლანჩხუთისა და ოზურგეთის მუნიციპალიტეტებში რამდენიმე ოჯახს დაუზიანა საცხოვრებელი სახლის სახურავები, ოჯახები უსაფრთხო ადგილზე არიან გადაყვანილები. რამდენიმედღიანი ინტენსიური თოვის შედეგად გურიის რეგიონის სამივე მუნიციპალიტეტში მკვეთრად იმატა თოვლის საფარმა. ნალექის დაწყების დღიდან მზადყოფნაშია მუნიციპალიტეტებში სპეციალური ტექნიკა, თუმცა რთული მეტეოროლოგიური
პირობების გამო, გაწმენდილი მონაკვეთები ხელახლა საჭიროებს გაწმენდას. დიდთოვლობის გამო რეგიონის მასშტაბით შეჩერდა სასწავლო – სააღმზრდელო პროცესი სკოლებსა და ბაღებში. დიდთოვლობამ დააზიანა ელექტროგადამცემი ხაზები და გაზის მილსადენები. “ენერგო-პრო -ჯორჯიას” და “სოკარ -გაზ ჯორჯიას” წარმომადგენლები ინტენსიურად მუშაობენ დაზიანებული მონაკვეთების აღდგენაზე. ამ ეტაპზე ელექტროენერგია არ მიეწოდება 4 800 აბონენტს და გაზმომარაგების გარეშე დარჩენილია 320-მდე აბონენტი.
0
0
