„მიხეილ სააკაშვილი აიყვანეს ინტენსიური თერაპიის პალატაში, მას პირველადი რეანიმაციული დახმარება გაეწია და გადავიდა ინტენსიურ თერაპიაში. ტრანსპორტირება ჩატარდა ნორმალურად, კარგად, მოხერხდა ავადმყოფის ჩამოყვანა გორში, ჩაუტარდა რამდენიმე ტესტი იქვე, დაახლოებით ერთი საათის განმავლობაში. მდგომარეობა მძიმეა, რთულია.

აქ მომუშავე ბევრ ექიმს ვიცნობ, საკმაოდ გამოცდილი და კარგი ექიმები არიან. ასევე მორიგეობს რესპუბლიკური საავადმყოფოს ჯგუფი, რეანიმატოლოგები, რომლებიც დღესაც დარჩებიან და აქ იქნებიან მუდმივად მორიგეობით“, – განაცხადა ნიკოლოზ ყიფშიძემ.

მისივე თქმით, სავარაუდოდ ორ დღეში მოინახულებენ სააკაშვილს სახალხო დამცველთან არსებული ექიმთა ჯგუფის წევრები, მოგვიანებით კი, „ემპათიას“ ჯგუფის წარმომადგენლები.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვდნენ, იუსტიციის სამინისტრო კი აცხადებდა, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.