ცხინვალის ტბაში ქალი დაიხრჩო. მან შვილის გადარჩენა სცადა და თავად დაიღუპა. ინფორმაციას „ეხო კავკაზა“ ავრცელებს.

როგორც ერთ-ერთმა თვითმხილველმა, დიმიტრი კოტაევმა განაცხადა, ბავშვი გადარჩა, ხოლო ქალს წყლიდან ამოყვანის მომენტში უკვე სიცოცხლის კვალი არ აღენიშნებოდა.

„დავინახე, რომ პატარა გოგო იხრჩობა - ჩავხტი და ამოვიყვანე, ის უგონოდ იყო, მაგრამ მისი აზრზე მოყვანა მოხერხდა. შემდეგ დავინახეთ რომ ქალი იხრჩობა, გადავხტით მის გადასარჩენად, მე და რადიონ თედეევი, მაგრამ წყლიდან რომ ამოვიყვანეთ, უკვე გარდაცვლილი იყო და გონზე არ მოსულა“, - ამბობს კოტაევი.

გადარჩენილი ბავშვის სიცოცხლეს საფრთხე არ ემუქრება. დე ფაქტო სამართალდამცველმა ორგანოებმა მომხდარის გამოძიება დაიწყეს.