„ნაცმოძრაობის“ რეჟიმის მიერ ჩადენილ დანაშაულებს დამატებითი თავმოყრა არ სჭირდება, ეს ყველაფერი დროებითმა საგამოძიებო კომისიამ მოიკვლია და ქართველი ხალხის მეხსიერებაშია, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა საკონსტიტუციო სასამართლოში „ნაციონალური მოძრაობის“ მიერ შეტანილ სარჩელთან დაკავშირებით განაცხადა.

მათიკაშვილის თქმით, „ნაციონალური მოძრაობა“ ცდილობს, მათ მიერ ჩადენილი ქმედებები გადაფაროს.

„ყველას კარგად გვახსოვს, „ნაცმოძრაობა“ რას სჩადიოდა. ამ ყველაფრის გადაფარვას ცდილობენ, რაც არ გამოუვათ, რადგან საკონსტიტუციო სასამართლო სარჩელს განიხილავს. ეჭვი მეპარება, მათ რაიმე არგუმენტი ჰქონდეთ, ან რა უნდა ჰქონდდთ, მაგრამ თუ რაიმე აქვთ, სასამართლოში წარადგინონ“, – აღნიშნა დავით მათიკაშვილმა.

ცნობისთვის, „ერთიანობა – ნაციონალურმა მოძრაობამ“ 13 დეკემბერს განცხადება გაავრცელა, რომელშიც აღნიშნულია, რომ პარტიამ „საკონსტიტუციო სასამართლოში „ქართული ოცნების“ მიერ მიღებული იმ კანონების წინააღმდეგ შეიტანა სარჩელი, რომლებიც პოლიტიკურ პარტიებსა და კონკრეტულ პირებს პოლიტიკური საქმიანობის განხორციელებას უკრძალავს“.