გრიფით საიდუმლო მოხსნილია - თავდაცვის სამინისტრო მის უწყებასა და ავიაკომპანია "ჯორჯიან ეარვეიზს" შორის გაფორმებული ჩარჩო ხელშეკრულების დეტალების გასაჯაროებას ეტაპობრივად აპირებს.

საუბარია 2010-დან 2012 წლამდე პერიოდზე და ის მიხეილ სააკაშვილის პრეზიდენტობის დროს განხორციელებულ ფრენებს ეხება. დოკუმენტების მიხედვით, დახარჯული 24 მილიონიდან 14 კერძო რეისების შესრულებას მოხმარდა. მათ შორის საუბარია მოგზაურობაზე კოლუმბიაში, ნიცასა და კანში.

დაიწყება თუ არა გამოძიება დიდი ოდენობით საბიუჯეტო სახსრების მიტაცების გამო? ხელშეკრულებებთან დაკავშირებულ კითხვებს თავს არიდებს "ნაციონალური მოძრაობის" წევრთა ნაწილი. მეორე ნაწილი კი აცხადებს, რომ ექსპრეზიდენტის ვიზიტები და შესაბამისად, ფრენის ხარჯები, ქვეყნის ინტერესებს ემსახურებოდა.