11/03/2022
14:36
პოლიტიკა
ინტერვიუში საქართველოს პრეზიდენტი განმარტავს, რატომ არის ახლა მნიშვნელოვანი მკაფიო სიგნალები ვლადიმერ პუტინისთვის.
„უკრაინა იმსახურებს ჩვენს სრულ სოლიდარობას, მაგრამ მოლდოვა და საქართველო არ უნდა დარჩეს გვერდით, რადგან ჩვენც ვართ ზეწოლის ქვეშ და ირიბად გვემუქრებიან. რუსეთს უკვე ოკუპირებული აქვს ჩვენი ტერიტორიის ნაწილი. რუსეთისგან მომდინარე აგრესიის საშიშროება არსებობს, თუმცა ამ ეტაპზე უშუალო საფრთხე არა, რადგან მათი ჯარი უკრაინაშია მობილიზებული.
ჩვენ არ ვიცით, სად მთავრდება პუტინის მადა”, - განაცხადა ზურაბიშვილმა.
ზურაბიშვილმა აღნიშნა, რომ ევროკავშირმა, ამ გადაწყვეტილების მისაღებად, ბევრი დრო დაკარგა და საქართველოს 1992/93 წლების ომიდან გაკვეთილი არ ისწავლა. მისი თქმით, „ეს იყო რუსეთის პასუხი საქართველოს დამოუკიდებლობაზე“.
ზურაბიშვილის თქმით, 2008 წლის აგვისტოს შეჭრის შედეგად, მას {პუტინს} შეექმნა შთაბეჭდილება, რომ ევროკავშირი საშუალებას მისცემდა განეხორციელებინა მისი იმპერიალისტური გეგმები, მაგრამ ამ სტრატეგიამ არ იმუშავა.
პრეზიდენტი აღნიშნავს, რომ პუტინის მიზანი იყო საქართველოს დაბრუნება „რუსეთის იმპერიაში“. ასევე, ომი, რუსული სამხედრო ბაზები, რუსიფიკაცია და ოკუპირებულ ტერიტორიებზე ქართული ენის აკრძალვა და საოკუპაციო საზღვრების შეცვლა, ეს ყველაფერი პუტინის ამბიციას ემსახურებოდა. თუმცა, ზურაბიშვილმა ხაზი გაუსვა ფაქტს, რომ საქართველოს დამოუკიდებლობის სურვილი დაუშრეტელია და ევროპული მომავლისკენ ლტოლვა კიდევ უფრო ძლიერი, ვიდრე ოდესმე.
„უკრაინის წინააღმდეგ ომი კიდევ უფრო ტოტალურია, უფრო სასტიკი, ვიდრე თავდასხმა, რომელიც ჩვენ განვიცადეთ”, - განაცხადა ზურაბიშვილმა.
„ავღანეთიდან ამერიკელების გაყვანა, ალბათ, სისუსტის კიდევ ერთ ნიშნად იქნა მიჩნეული“, - ამბობს პრეზიდენტი.
რაც შეეხება სანქციებს, ზურაბიშვილის თქმით, საქართველოს ეფექტური სანქციების დაწესების შესაძლებლობა ამ ეტაპზე არ აქვს.
”ჩვენ თითქმის არ გვაქვს რაიმე ეფექტური ინსტრუმენტი მოსკოვის სანქციებისთვის,” - განაცხადა პრეზიდენტმა.
ზურაბიშვილმა უკრაინისადმი სოლიდარობის აქციებზეც ისაუბრა, რისთვისაც დედაქალაქ თბილისში რეგულარულად იკრიბება ათიათასობით ადამიანი.
„რუსეთთან ურთიერთობა აღარასოდეს იქნება ძმური, უკრაინის წინააღმდეგ სასტიკი აგრესიული ომის შემდეგ. მე ვამაყობ გერმანიით, საფრანგეთით და ევროკავშირის სხვა პარტნიორებით, რადგან ვგრძნობ რეალურ ცვლილებას,” - აღნიშნა ზურაბიშვილმა.
პრეზიდენტის განცხადებით, შესაძლოა გადაფასება დაგვიანდეს, მაგრამ მთავარია, რომ მათ (გერმანია, საფრანგეთი, ევროკავშირის სხვა პარტნიორები) „თვალები გაახილეს“.
0
0