ჯანდაცვის მსოფლიო ორგანიზაციის განცხადებით, ჩრდილოეთ ღაზა, საწვავის, სამედიცინო პერსონალისა და მედიკამენტების დეფიციტის გამო, ფუნქციონირებადი საავადმყოფოს გარეშე დარჩა.

”ჩრდილოეთ ღაზაში, ფაქტობრივად, ფუნქციონირებადი საავადმყოფოები აღარ არსებობს. ალ-აჰლის [ჰოსპიტალი] ერთადერთია, რომელიც მინიმალურად ფუნქციონირებს. საჭიროა ღაზადან კიდევ მეტი პაციენტის ევაკუაცია ეგვიპტეში ან სხვა ქვეყნებში სამკურნალოდ”, - განუცხადა Reuters-ს ღაზაში ჯანმოს წარმომადგენელმა რიჩარდ პეპერკორნმა.

,,ჩრდილოეთ ღაზაში მდებარე საავადმყოფოები „თავშესაფრად“ იქცა, სადაც ადამიანები სიკვდილს ელოდებიან. მძიმედ დაშავებული პაციენტები ჭრილობაში შეჭრილი ინფექციებისგან დაიღუპებიან. ისინი წამლების ნაცვლად, წყალს ითხოვენ, რომელიც ასევე დეფიციტშია“, - განაცხადა ჯანმოს გუნდის ხელმძღვანელმა შონ ქეისიმ. 

როგორც Reuters-ი წერს, ღაზას მთელ ტერიტორიაზე მიმდინარე ინტენსიური ბრძოლის ფონზე, საავადმყოფოებში მედიკამენტებისა და ელექტროენერგიის დეფიციტია შექმნილი

20 დეკემბერს, ალ-აჰლიში ვიზიტის შემდეგ, ჯანდაცვის მსოფლიო ორგანიზაციისა და გაეროს გუნდებმა განაცხადეს, რომ საავადმყოფო გადატვირთული იყო იმ ადამიანებით, რომლებსაც სასწრაფო დახმარება ესაჭიროებოდათ,  საავადმყოფოს ეზო კი გარდაცვლილთა სხეულებით აივსო.

X-ზე გამოქვეყნებულ პოსტში, ჯანმოს გენერალურმა დირექტორმა, ტედროს ადჰანომ გებრეიესუსმა განაცხადა, რომ ორი დღის წინ, ჩრდილოეთ ღაზაში ალ-აჰლის საავადმყოფო ბოლო ადგილი იყო, სადაც დაშავებულებს ოპერაციები უტარდებოდათ, მაგრამ საოპერაციო განყოფილებები ამჟამად აღარ ფუნქციონირებს. 

,,მხოლოდ ოთხი საავადმყოფო დარჩა, რომლებიც პაციენტებს უკიდურესად შეზღუდული სამედიცინო დახმარებით უზრუნველყოფს,“ - დასძინა გებრეიესუსმა.