კონსტიტუციაში გვიწერია, რომ თავად პრემიერს უნდა ჰქონდეს პარლამენტის ნდობა და არა პრეზიდენტს უნდა ჰქონდეს პრემიერის ნდობა, – ამის შესახებ „ლელოს“ ერთ-ერთმა ლიდერმა, დავით უსუფაშვილმა საქართველოს პირველი არხის გადაცემაში „თავისუფალი ხედვა“ განაცხადა.

„როდესაც პრემიერმა გამოგვიცხადა, პრეზიდენტმა ჩემი ნდობა დაკარგა და გადავწყვიტე, დიახ, შემეზღუდა მისთვის გადაადგილების თავისუფლებაო, უკაცრავად, მაგრამ რას ნიშნავს პრემიერმა პრეზიდენტის ნდობა დაკარგა?! მე მგონი, კონსტიტუციაში გვიწერია, რომ თავად პრემიერს უნდა ჰქონდეს პარლამენტის ნდობა და არა პრეზიდენტს უნდა ჰქონდეს პრემიერის ნდობა“, – განაცხადა უსუფაშვილმა.

მისივე თქმით, ბრალდება, რომ პრეზიდენტმა კონსტიტუცია დაარღვია, არის დაუსაბუთებელი ბრალდება.

„ამ წუთის მდგომარეობით, მე ასი პროცენტით შემიძლია, გითხრათ – როგორც იურისტს, მჯერა, რომ ეს არის სამართლებრივად დაუსაბუთებელი ბრალდება. კონსტიტუცია მთლიანადაა წასაკითხი“, – განაცხადა უსუფაშვილმა.

ამასთან, უსუფაშვილმა აღნიშნა, რომ პრეზიდენტთან დაკავშირებული ეს ძიძგილაობა ქვეყნისთვის დამაზიანებელია.