ბოლო სამი კვირის განმავლობაში პირველად, „ბრენტის“ მარკის ბარელი ნავთობის ფასმა 110 დოლარს გადააჭარბა.

ბრენტის ნავთობის გლობალური საორიენტაციო ფასი დილის ვაჭრობისას 2.7 პროცენტით გაიზარდა და ბარელზე 111.2 დოლარი შეადგინა. აშშ-ის საორიენტაციო ფასი, ბარელზე 2.3 პროცენტით გაიზარდა და 98.5 დოლარი შეადგინა.

„სიენენის“ თანახმად, მოვაჭრეები შეშფოთებული არიან, რომ შეერთებული შტატები და ირანი ომის დასრულებისა და სასიცოცხლოდ მნიშვნელოვანი ჰორმუზის სრუტის სრულად გახსნის შესახებ შეთანხმებასთან ახლოს არ არიან.

„ჩიხი და სრუტის დახურვა კვლავ უარყოფითად მოქმედებს ნავთობის ფასებზე. რაც უფრო დიდხანს იქნება სრუტე დაკეტილი, მით უფრო უარყოფით გავლენას მოახდენს ეს გლობალურ ეკონომიკაზე“, – აცხადებს მოჰიტ კუმარი, საინვესტიციო ბანკ „ჯეფრისის“ ეკონომისტი.