ჩემი ვარაუდია, რომ ლგბტ პროპაგანდის მხარეს დიდი ფინანსები დგას - გამოაქვეყნონ ფინანსები და უარყონ, რომ პროპაგანდის მხარდაჭერაში ფული არ იხარჯება! ვიღებ ჩემს თავზე პასუხისმგებლობას და თვითკრიტიკულად ვამბობ: - ვაბრალებ მათ, რომ ლგბტ პროპაგანდისთვის ფინანსების დიდი ნაწილი იხარჯება - უთხრან დამფინანსებლებსა და მოქალაქეებს, რომ ეს არის მართალი ან ტყუილი! - აღნიშნული განცხადება პარლამენტში უმრავლესობის ლიდერმა მამუკა მდინარაძემ გააკეთა.

მისი თქმით, ლგბტ პროპაგანდის მხარდასაჭერად არასამთავრობო ორგანიზაციებისა და მედია საშუალებების მხრიდან დაწყებულია კოორდინირებული კამპანია, რომლის წარმოება დიდი ფინანსების გარეშე შეუძლებელია.

„ადგილი აქვს კოორდინირებულ ქცევას, რათა ლგბტ პროპაგანდა და უფლებები გააიგივონ და დაახლოვონ. ჩვენი მიზანია, უფლებები და პროპაგანდა ერთმანეთს დავაშოროთ და უფლებებს არავინ შეეხოს. ამაზე იბრაზებენ თავს! უფლებების დაცვის ხარისხი აბრაზებთ?! ჩვენ ვეუბნებით, უფლებების დაცვის ხარისხი გავზარდოთ! - ამაზე ბრაზდებიან? პროპაგანდა ავკრძალოთ! - ამაზე ბრაზდებიან? გვითხრან!

გუშინ ისინი ცისარტყელამ გააერთიანა - რაც ჩვენ ვერ ვქენით, ის ცისარტყელამ ქნა! სხვა მხრივ გაერთიანება ვერ გაბედეს და ცისარტყელამ და მისმა ფერებმა გააერთიანა. იყვნენ აჟიტირებული და გახარებული. მართლა პროპაგანდისტები არიან - ბავშვებს ცისარტყელა წაართვეს“, - განაცხადა მდინარაძემ.

პარლამენტში მმართველი უმრავლესობის ინიციატივით ორი - ერთმანეთისაგან დამოუკიდებელი საკონსტიტუციო ინიციატივა დარეგისტრირდება.