ბაიდენის ადმინისტრაციაში რამდენიმე მაღალჩინოსანზე დაყრდნობით, „ნიუ-იორკ თაიმსი“ იუწყება, რომ ისრაელს ურჩიეს, გადაედო ღაზაში სახმელეთო შეჭრა, იმ იმედით, რომ დროს მოიგებდნენ მძევლების გასათავისუფლებლად მოლაპარაკებებისას და ჰუმანიტარული დახმარების მისაწოდებლად პალესტინელებისთვის ანკლავში.
მანამდე „ბლუმბერგმა“ საკუთარ წყაროებზე დაყრდნობით დაწერა, რომ ჯო ბაიდენის ადმინისტრაცია, ისევე როგორც ზოგიერთი ევროპელი ლიდერი, ზეწოლას ახორციელებს ისრაელზე, რათა გადადოს ოპერაცია ჰამასის წინააღმდეგ.
გასულ ღამეს ბაიდენსა და ისრაელის პრემიერ-მინისტრ ბენიამინ ნეთანიაჰუს შორის მორიგი სატელეფონო საუბარი შედგა.
ამერიკელებს, ასევე, სურთ მეტი დრო, მოემზადონ ირანის მიერ მხარდაჭერილი ჯგუფების მიერ რეგიონში აშშ-ს ინტერესებზე შესაძლო თავდასხმებისთვის - რაც სერიოზულ შეშფოთებას იწვევს, რომ ღაზაში ძირითადი სახმელეთო ოპერაცია გაძლიერდება.
გაზეთის თანამოსაუბრეებმა აღნიშნეს, რომ ამერიკის ადმინისტრაცია მოთხოვნებს არ უყენებს ისრაელს და განაგრძობს სახმელეთო შემოჭრისა და ისრაელის მიზნის - ჰამასის ლიკვიდაციის მხარდაჭერას.
რჩევა სახმელეთო ოპერაციის გადადების შესახებ ისრაელებს თავდაცვის მდივანმა ლოიდ ოსტინმა გადასცა. პენტაგონი ეხმარება ისრაელს სამხედრო ოპერაციების დაგეგმვაში, მათ შორის სახმელეთო შეჭრაში.
ამავდროულად, ვაშინგტონში ისრაელის საელჩოს ანონიმმა დიპლომატმა უარყო, რომ აშშ-ის მთავრობა ისრაელს ურჩევდა სახმელეთო შეჭრის გადადებას.
0
0
