თბილისის საქალაქო სასამართლოს მოსამართლე გიორგი გელაშვილმა დღეს თანაინვესტირების ფონდის ყოფილი ხელმძღვანელის გიორგი ბაჩიაშვილის საქმე განიხილა.

გიორგი ბაჩიაშვილმა საქმის განხილვის დაწყებამდე მედიასთან განაცხადა:

„ეს იყო ტყუილი, რომელიც „იმედმა“ მოიგონა, ეს არის ივანიშვილის პირადი ტელევიზია, რომელიც ივანიშვილის მიერ ფინანსდებოდა ყოველთვის და შესაბამისად, ივანიშვილის ნარატივს აჟღერებს. თქვენ თქვით, აქციებს აფინანსებსო, აქციების დაფინანსება არის სხვა. აქციების დაფინანსების მექანიზმი არ არსებობს, მე არ ვიცი, როგორ დავაფინანსო აქციები, არ არსებობს ეს მექანიზმი, იქ არავის არც ხელფასი ეხდება მონაწილეობაში და არც არაფერია. რა დაფინანსება უნდა აქციას? პროტესტი ვისაც აქვს, ხალხი გამოდის და თავისი ფასეულობებისთვის დგანან, ქვეყნის დემოკრატიისა და ევროპული მომავლისთვის იბრძვიან. რა დაფინანსება უნდა ამას, ვერ გავიგე. უბრალოდ სახელმწიფო, რომელიც რეპრესირებს ხალხს, რომელიც სცემს და საშინელ მდგომარეობაში ამყოფებს ხალხს, ვინც თავისი ფასეულობის გამო გარეთ დგას, იმ ხალხს ვეხმარები და ყოველთვის დავეხმარები ასეთ ხალხს.

გარწმუნებთ, ეს არის მხოლოდ და მხოლოდ ის ფონდები – და მე სხვანაირი ფონდები არ ვიცი – რომლებიც ეხმარებიან დაზარალებულ ადამიანებს. იმ ადამიანებს, რომლებიც გამოუშვეს სამსახურებიდან. მე ამ ფონდებს არ დავასახელებ, რადგან სახელმწიფოსგან მიმდინარეობს ზეწოლა ყველა მიმართულებით. მე არ მინდა, ჩემი დახმარება გახდეს ვიღაცაზე ზეწოლის მიზეზი“, – განაცხადა გიორგი ბაჩიაშვილმა.

რაც შეეხება კითხვას, „გუშინ თქვით, რომ აქციებზე დაკავებულებს და დაშავებულებს ეხმარებით, დღეს – სამსახურიდან გათავისუფლებულებსო, კიდევ ხომ არ არის ვინმე, ვისაც ეხმარებით აქციებზე?“, – ბაჩიაშვილმა უპასუხა: „გუშინ ვთქვი, პროცესში დაზარალებულები, მათ შორის ნაცემები, ეს ფონდები, რა თქმა უნდა, ეხმარებიან, მათ შორის იმათ, ვინც სამსახურიდან გამოუშვეს“.