11 ივლისს ვილნიუსში მუშაობას შეუდგა ნატოს სამიტი, რომელიც, სავარაუდოდ, კვლავ დაადასტურებს ღია კარის პოლიტიკისადმი ერთგულებას პარტნიორ ქვეყნებთან, მათ შორის საქართველოსთან მიმართებით. ამის შესახებ საუბარია ნატოს ქვეყნების სახელმწიფო მეთაურების დასკვნით კომუნიკეში, რომლის პროექტსაც რადიო თავისუფლება გამოქვეყნებამდე გაეცნო.
„ჩვენ კვლავ ვადასტურებთ 2008 წლის ბუქარესტის ნატოს სამიტის გადაწყვეტილებას, რომ საქართველო ალიანსის წევრი გახდება გაწევრიანების სამოქმედო პროგრამით (MAP), რაც პროცესის თანმიმდევრულ ნაწილს წარმოადგენს. ჩვენ მივესალმებით გაუმჯობესებული ნატოს არსებითი პაკეტის რეალიზების პროცესში კრიზისების მართვის, კიბერუსაფრთხოების, სამხედრო ინჟინერიის, ელექტრონული კომუნიკაციების დაცვის მხრივ მიღწეულ პროგრესს, ისევე როგორც ახალ ინიციატივებს ქიმიური, ბიოლოგიური, რადიაციული თავდაცვისა და საწვრთნელი შესაძლებლობების სფეროებში; თავისი ევროატლანტიკური მისწრაფებების გასავითარებლად საქართველომ უნდა მიაღწიოს პროგრესს რეფორმების, მეტადრე გადამწყვეტი დემოკრატიული რეფორმების მხრივ და საუკეთესოდ გამოიყენოს ყოველწლიური ეროვნული პროგრამა (ANP)“, - ნათქვამია ნატოს ვილნიუსის სამიტის დეკლარაციის პროექტში.
დოკუმენტში ალიანსის წევრი სახელმწიფოები კვლავ დაადასტურებენ საქართველოს ტერიტორიული მთლიანობისა და სუვერენიტეტისადმი მხარდაჭერას მის საერთაშორისოდ აღიარებულ ფარგლებში და მოუწოდებენ რუსეთს, "უკან წაიღოს საქართველოს რეგიონების, აფხაზეთისა და სამხრეთ ოსეთის აღიარება; წერტილი დაუსვას ამ რეგიონების მილიტარიზაციას და მცდელობებს, რომ საზღვრის მსგავსი კონსტრუქციების აღმართვით ძალადობრივად მოწყვიტოს ისინი დანარჩენ საქართველოს“, - ნათქვამია დოკუმენტის პროექტში, რომლის ტექსტსაც რადიო თავისუფლება საკუთარი წყაროების საშუალებით სამიტის კულუარებში გაეცნო.
სამიტის კომუნიკე საბოლოო სახით 11 ივლისს, ჩრდილოატლანტიკური საბჭოს (NAC) სხდომის დასრულების შემდეგ, გამოქვეყნდება.
რაც შეეხება უკრაინას, ალიანსს დაგეგმილი აქვს, გაწევრიანების მაგივრად, უკრაინას შესთავაზოს „უსაფრთხოების გარანტიები“, რაც ხანგრძლივ სამხედრო, ფინანსურ და ეკონომიკურ დახმარებას გულისხმობს.
ამას გარდა, ვილნიუსში უკრაინა ნატოს კიდევ უფრო დაუახლოვდება და იმოქმედებს უკვე არსებული ნატო-უკრაინის კომისიის განვითარებული ვარიანტი, ნატო-უკრაინის საბჭო, რომლის საინაუგურაციო სხდომას პრეზიდენტი ვოლოდიმირ ზელენსკიც დაესწრება.
წყარო: რადიო თავისუფლება
0
0
