თბილისში მიმდინარე მსოფლიო თასის გათამაშებაზე პარაწოლჭიმში საქართველოს ნაკრების ანგარიშზე ორი მედალი და ევროპის რეკორდია.

აჰმად რაზმაზარი თბილისი 2023-ის გამარჯვებული და კონტინენტის რეკორდსმენი გახდა. ჩვენმა პარასპორტსმენმა (-80)კგ. წონით კატეგორიაში 211კგ. დაძლია და დღეს დამყარებული თავისივე რეკორდი გააუმჯობესა. შოთა ომარაშვილმა (-80კგ) კი 160 კგ დააფიქსირა და შეჯიბრებაზე ბრინჯაოს მედალი მოიპოვა.

მსოფლიო თასი დღეს დაიწყო და პირველი მაისის ჩათვლით გაიმართება. თბილისის შეჯიბრება პარიზის 2024 წლის პარალიმპიური თამაშების წინა საკვალიფიკაციო ტურნირია.

მსოფლიო თასის ორგანიზატორი საქართველოს პარალიმპიური კომიტეტია. ტურნირის მხარდამჭერები – კულტურის, სპორტისა და ახალგაზრდობის სამინისტრო, თბილისის მერია და საზოგადოებრივი მაუწყებელია.