ალეკო ელისაშვილი ქმედებას აღიარებს, თუმცა ის არ თვლის, რომ მისი ქმედება იყო დანაშაულის შემცველი, - ამის შესახებ მისმა ადვოკატმა, გიორგი რეხვიაშვილმა ჟურნალისტებს დიღმის იზოლატორთან განუცხადა.

ადვოკატის განმარტებით, ელისაშვილის პოზიციაა, რომ „უსამართლო სასამართლოსთვის ცეცხლის წაკიდება დანაშაული არ არის“, ტერორიზმის მუხლით წარდგენილი ბრალი კი აბსურდია.

„ალეკო ელისაშილი ბრალს არ აღიარებს. ის თვლის, რომ რაღაც ქმედებები ჩაიდინა, რომელიც დანაშაულს არ წარმოადგენს, ეს არის მისი პროტესტის გამოხატვის ფორმა მხოლოდ და მხოლოდ. უსამართლო სასამართლოს მიმართ იყო მიძღვნილი და ზოგადად, ეს იყო სოლიდარობა პოლიტპატიმრებისთვის. აქედან გამომდინარე, მუხლი, რომელშიც წარდგენილია, არის აბსურდული. თქვენ რამდენი ადამიანი გახსენდებათ, მითუმეტეს პოლიტიკოსი, რომელსაც ტერორიზმის მუხლს წაუყენებენ. მითუმეტეს ისეთ ქმედებას, რომელიც არ განხორციელებულა და სისრულეში მოყვანილი არ არის. ალეკო ელისაშილი ქმედებას აღიარებს, თუმცა ის არ თვლის, რომ მისი ქმედება იყო დანაშაულის შემცველი. მისი პოზიცია არის ის, რომ უსამართლო სასამართლოსთვის ცეცხლის წაკიდება დანაშაული არ არის“,-განაცხადა ადვოკატმა.

გიორგი რეხვიაშვილის ინფორმაციით, სასამართლ ელისაშილისთვის აღკვეთის ღონისძიების შეფერდებაზე სავარაუდოდ, ხვალ იმსჯელებს.

„დღეს შეიტანენ სასამართლოში ამ დოკუმენტაციას. ხვალისთვის ველოდებით, რომ დაინიშნოს სასამართლო პროცესი და ხვალ ველოდებით, რომ სასამართლო იმსჯელებს აღკვეთის ღონისძიების შეფარდებასთან დაკავშირებით. სასამართლო პროცესს დაესწრება და თავის პოზიციასაც დააფიქსირებს. ჩვენ სტანდარტულად გირაოს შევთავაზებთ, თუმცა თანხის ოდენობას ხვალ მოგახსენებთ“, - განაცხადა ადვოკატმა.

მისივე განმარტებით, საქმეს ამ ეტაპზე გენერალური პროკურატურა იძიებს.

„საქმეში არის ვიდეომტკიცებულებები, რომელიც ამ ეტაპზე ჩემთვის ცნობილი არ არის და გავეცნობი. რამდენიმე წუთის წინ გადმომეცა ეს დოკუმენტები, არ გავცნობივარ, ვნახავ, შევამოწმებ და იმის შემდეგ უკვე მეცოდინება, რამდენად კვალიფიციურად არის ჩატარებული საგამოძიებო მოქმედებები“, - განაცხადა ადვოკატმა.

ადვოკატ გიორგი რეხვიაშვილის ინფორმაციით, ელისაშვილს ბრალი გადაუკვალიფიცირეს და მას ტერორიზმს ედავებიან.