2024 წლის ევროპის ჩემპიონატის გახსნით შეხვედრაში მასპინძელმა გერმანიის ნაკრებმა შოტლანდია 5:1 დაამარცხა.

21 წლის და 42 დღის ფლორიან ვირცი გერმანიის ნაკრების ისტორიაში ევროპის ჩემპიონატზე ყველაზე ახალგაზრდა ფეხბურთელი გახდა, რომელმაც გოლი გაიტანა.

ევროპის ჩემპიონატების ისტორიაში, გახსნით მატჩში სარეკორდო სხვაობით გამარჯვება დაფიქსირდა. აქამდე ყველაზე დიდი ანგარიშით ევრო 2020-ზე იტალიამ თურქეთი დაამარცხა – 3:0.

ტონი კროოსს შოტლანდიასთან მატჩის პირველ ტაიმში პასების 100%-იანი სიზუსტე ჰქონდა, 55 დან 55 ზუსტი გადაცემა.

10′ წუთი. იოზუა კიმიხის გადაცემის შემდეგ ევრო 2024-ის პირველი გოლი „ლევერკუზენის“ შემტევმა ნახევარმცველმა, ფლორიან ვირცმა გაიტანა და გერმანიის ნაკრები დააწინაურა.

19′ წუთი. კაი ჰავერცმა საჯარიმო მოედანში შესული ჯამალ მუსიალა მონახა, რომელმაც მასპინძელთა უპირატესობა ორამდე გაზარდა.

44′ წუთი. შოტლანდიის ნაკრებისა და „უოტფორდის“ ცენტრალურმა მცველმა, რაიან პორტეუსმა საკუთარ საჯარიმოში ილქაი გიუნდოგანი წააქცი. ვიდეორეფერიზე გადამოწმების შემდეგ შეხვედრის ფრანგმა არბიტრმა, კლემან ტურპენმა შოტლანდიელი მოედნიდან გააძევა.

45+1′ წუთი. გიუნდოგანის წაქცევისთვის დანიშნული პენალტი ლონდონის „არსენალის“ ფეხბურთელმა, კაი ჰავერცმა გამოიყენა და გერმანიამ პირველი ტაიმი 3:0 მოიგო.

68′ წუთი. მოედანზე კაი ჰავერცის ნაცვლად შესულმა „დორტმუნდის“ თავდამსხმელმა, ნიკლას ფიულკრუგმა გერმანიის ეროვნული გუნდის უპირატესობა ოთხამდე გაზარდა.

87′ წუთი. გერმანიის ნაკრების მცველმა, ანტონიო რუდიგერმა ბურთი საკუთარ კარში გაიტანა. აღსანიშნავია, რომ ავტოგოლი ევრო 2020-ის გახსნით შეხვედრაშიც გავიდა, მაშინ ბურთი თავის კარში თურქმა ფეხბურთელმა, მერიჰ დემირალმა ჩაჭრა.

90+2′ წუთი. შეხვედრაში საბოლოო ანგარიში „დორტმუნდის“ ნახევარმცველმა, ემრე ჯანმა დააფიქსირა – 5:1.

პირველი ტურის შემდეგ გერმანიის ნაკრებს 3 ქულა აქვს. A ჯგუფის მეორე შეხვედრაში უნგრეთის ეროვნული გუნდი შვეიცარიას შეხვდება.

“პირველი არხი”