საქართველოს მორაგბეთა ნაკრებმა რაგბი ევროპის ჩემპიონატის მესამე ტურის მატჩი ესპანეთის ქალაქ ტორელავეგაში ჩაატარა და მეტოქე 41:3 დაამარცხა. ქართველებმა ესპანეთის ნაკრებს 7 ლელო გაუტანა და დამსახურებულად გაიმარჯვა.

ამრიგად, საქართველოს ნაკრებმა ჯგუფში პირველი ადგილი დაიკავა და ნახევარფინალურ შეხვედრას თბილისში ჩაატარებს, „ბორჯღალოსნების“ მეტოქე 19 თებერვალს, რუმინეთისა და პორტუგალიის მატჩში გაირკვევა.

შეგახსენებთ, რომ ჯგუფის ორ-ორი მოწინავე თასის ნახევარფინალში გადის – A ჯგუფის გამარჯვებული B ჯგუფის მეორეადგილოსანს მასპინძლობს, B ჯგუფის გამარჯვებული კი A ჯგუფის მეორეადგილოსანს. ჯგუფში მესამე-მეოთხეადგილოსნები V-VIII ადგილებისთვის განაგრძობენ ბრძოლას.

ნახევარფინალები 4-5 მარტს, ხოლო ფინალები 18-19 მარტს შედგება.