„სააკაშვილმა სამხედრო ავანტიურა“ 2008 წლის აგვისტოში მოაწყო შეერთებული შტატების ორგანიზებით. ამის შესახებ ნიკოლაი პატრუშევი, რუსეთის უშიშროების საბჭოს ყოფილი მდივანი, ახლა კი პრეზიდენტის თანაშემწე და რუსეთის საზღვაო კოლეგიის თავმჯდომარის თანაშემწე „იზვესტიასთან“ ინტერვიუში აცხადებს.

„ტყუილი და პროვოკაცია ვაშინგტონისა და სხვა დასავლური ქვეყნების პოლიტიკის ჩვეულებრივი თანამგზავრია. სწორედ ამერიკელებმა მოაწყვეს სააკაშვილის სამხედრო ავანტიურა 2008 წლის აგვისტოში. თუმცა, ისინი აცხადებდნენ, რომ მათთან არანაირი კავშირი არ ჰქონდათ. აშშ-ს პირდაპირმა ჩარევამ საქართველოს საქმეებში გამოიწვია აფხაზეთისა და სამხრეთ ოსეთის გამოყოფა. მე მჯერა, ქართველმა ხალხმა იცის, რომ ამერიკელების ქმედებების გამო იტანჯება“, - განაცხადა პატრუშევმა.