მექსიკაში Volaris-ის რეისი, რომელიც გვადალახარადან მეხიკოში უნდა გაფრენილიყო, თვითმფრინავის სალონში კოღოების „შემოტევის“ გამო, ორ საათზე მეტით გადაიდო.

თვითმფრინავში მყოფმა მგზავრებმა ვიდეო გადაიღეს, რომელიც ინტერნეტში გავრცელდა, სადაც თვითმფრინავის სალონში არსებული ვითარება ჩანს. ბორტგამცილებლები ხელებს იქნევდნენ და ჰაერში მწერების საწინააღმდეგო საშუალებებს ასხურებდნენ.

თვითმფრინავი 6 ოქტომბერს 16:30 საათზე უნდა აფრენილიყო, თუმცა „ფრთოსანმა მავნებლებმა“ ავიაკომპანია აიძულეს ფრენა 19:00 საათამდე გადაედო.

მექსიკური მედია აღნიშნავს, რომ ტერიტორია, სადაც აეროპორტი მდებარეობს, იდეალური გარემოა კოღოების გავრცელებისთვის, ვინაიდან იგი მცენარეულობით მდიდარ, ნესტიან უბნებთან მდებარეობს.