„ქართულ ოცნებას“ მმართველობის 12 წლის მანძილზე რუსეთის სასარგებლოდ არაფერი გაუკეთებია“, - ამის შესახებ საქართველოს საგარეო საქმეთა მინისტრმა მაკა ბოჭორიშვილმა Euronews-თან ექსკლუზიური ინტერვიუს დროს განაცხადა.

საგარეო საქმეთა მინისტრმა უარყო მოსაზრება, რომ მთავრობა ევროკავშირს შორდება და უფრო მეტად მოსკოვისკენ იხრება.

„ქართული ოცნება“ ხელისუფლებაში 12 წელი იმყოფება. ვერავინ იპოვის ისეთ რაღაცას, რომ ამ მთავრობას 12 წლის მანძილზე რუსეთის სასარგებლოდ რამე გაეკეთებინა. მაგრამ დღეს ძალიან პოპულარულია სამყაროს დაყოფა თეთრად და შავად. თუ ვინმეს სურს ვიღაცაზე მარტივად ნეგატიური წარმოდგენა შექმნას, ადვილია თქმა იმისა, რომ პრორუსი, ან პროპუტინისტია“, - აღნიშნა ბოჭორიშვილმა.