„ჰამასის“ ოფიციალურმა წარმომადგენელმა ოსამა ჰამდანმა ლიბანში გამართულ პრესკონფერენციაზე განაცხადა, რომ აშშ-სა და ისრაელის მხარდამჭერ ყველა დასავლურ ქვეყანას "სრული პასუხისმგებლობა ეკისრება ღაზაში მშვიდობიანი მოსახლეობის მიმართ ომის წარმოებაზე".

ჰამდანმა აღნიშნული კომენტარი ღაზაში მდებარე ალ-აჰლის საავადმყოფოში მომხდარი აფეთქების შემდეგ გააკეთა. „ჰამასი“, რომელიც ღაზას სექტორს აკონტროლებს, აფეთქებაში ისრაელს ადანაშაულებს.

ისრაელის თავდაცვის ძალების მტკიცებით კი, აფეთქება პალესტინის ისლამური ჯიჰადის დაჯგუფების მიერ არასწორად გაშვებულმა კიდევ ერთმა რაკეტამ გამოიწვია.

როგორც ცნობილია, ისრაელი ღაზაზე საჰაერო დარტყმებს მას შემდეგ ახორციელებს, რაც „ჰამასის“ მებრძოლებმა (7 ოქტომბერს) ისრაელზე მასშტაბური სისხლისღვრა წამოიწყეს.