ლაგოდეხის მუნიციპალიტეტის სოფელ კაბალში ახალგაზრდებს შორის სიტყვიერი დაპირისპირება სუფრასთან დაიწყო.

ადგილობრივები აცხადებენ, რომ ახალგაზრდებმა კამათი ქუჩაში, სკოლის მიმდებარე ტერიტორიაზე გააგრძელეს.

„სუფრასთან უჩხუბიათ, მერე გარეთ გაუგრძელებიათ. როგორც ვიცი, წარსულში ერთმანეთთან პატარ-პატარა კინკლაობა ჰქონდათ. დანით არის დაჭრილი, მე რომ გამოვედი სკამზე იჯდა და ცუდად იყო. მაშინვე სასწრაფო გამოვიძახეთ, სკოლის ტერიტორიიდან აქამდე უვლია დაჭრილს“,- ამბობს კაბალში მცხოვრები პირი.

28 წლის ახალგაზრდა ამჟამად, ლაგოდეხის არქიმედეს კლინიკაში იმყოფება. ექიმების განმარტებით, მისი ჯანმრთელობის მდგომარეობა სტაბილურად მძიმეა.

გამოძიება მომხდარ ფაქტზე, სისხლის სამართლის კოდექსის 117- ე მუხლით დაიწყო, რაც სხეულის განზრახ მძიმე დაზიანებას გულისხმობს.