55 წლის ოლიგარქ ოლეგ დერიპასკას განცხადებით, რუსეთმა გაუძლო უკრაინაში შეჭრის გამო დასავლეთის მიერ დაწესებულ სანქციებს, ხოლო დასავლეთის იმედებს, რომ ის ომის დასასრულებლად ან რეჟიმის შეცვლისთვის მე-19 საუკუნის ასეთ იარაღს [სანქციებს] გამოიყენებს, განხორციელება არ უწერია. 

რუსეთის პრეზიდენტმა ვლადიმერ პუტინმა არაერთხელ შეახსენა დასავლეთს, რომ უკრაინასთან ხანგრძლივი ომის ფონზე,  რუსეთის 2,1 ტრილიონი დოლარის ღირებულების ეკონომიკა 2023 წელს, სავარაუდოდ, 2,8%-ით გაიზრდება, ხოლო მომავალ წელს -2,3%-ით.

რუსეთის სწრაფ ეკონომიკურ კრიზისთან დაკავშირებით დასავლური იმედები მცდარი აღმოჩნდა: მსოფლიოში მეორე უმსხვილესი ნავთობის ექსპორტიორს გლობალურ ბაზრებზე ნავთობის გაყიდვა არ უჭირს. გარდა ამისა, რუსეთს ჩინეთთან და ზოგიერთ სხვა ქვეყანასთან ღრმა სავაჭრო კავშირები აქვს. 

"ვერ წარმოვიდგენდი, კერძო ბიზნესი ასეთი მოქნილი თუ იქნებოდა. მეტ-ნაკლებად დარწმუნებული ვიყავი, რომ ეკონომიკის 30% ჩამოიშლებოდა, თუმცა ზარალი გაცილებით ნაკლებია. ბუნებრივი რესურსებით მდიდარი რუსეთი ზედმეტად მიმზიდველი გახდა ბევრისთვის ( მათ შორის ჩინეთისა და სხვა ქვეყნებისთვის) რომ მათ ოდესმე მიატოვონ რუსული ბაზარი. ამიტომ დასავლეთის იმედებს, რომ ის სანქციების გამოყენებით რუსეთის ლიდერებს შეცვლის, განხორციელება არ უწერია", - განუცხადა დერიპასკამ FT-ს. 

24 თებერვალს უკრაინაში შეჭრის შემდეგ, ბრიტანეთმა დერიპასკას პუტინთან სავარაუდო კავშირების გამო  სანქციები დაუწესა. მან სანქციები გააპროტესტა.

„გჯერათ, რომ სანქციები შეაჩერებს [ომს], შეცვლის რეჟიმის ან როგორმე დაგვაახლოებს კონფლიქტის დასასრულამდე? არა. ჩვენ სხვა გამოსავალი გვჭირდება“, - ციტირებს FT-ი ოლეგ დერიპასკას სიტყვებს. 
„ეჭვი მეპარება, რომ სანქციები - მე-19 საუკუნის იარაღი - გლობალურ სამყაროში გასაოცრად ეფექტური იქნება. არ მგონია, რომ ეს Wunderwaffe-ი [როგორც გერმანელები ამბობდნენ] ფინანსური სისტემის შეიარაღება მოლაპარაკების ერთგვარი ინსტრუმენტია”, - თქვა დერიპასკამ.

2018 წელს შეერთებულმა შტატებმა დერიპასკასა და სხვა გავლენიან რუსებს სანქციები დაუწესა, რადგან მისი განმარტებით, ისინი სარგებელს იღებდნენ რუსული სახელმწიფოსგან, რომელიც მთელ მსოფლიოში „მავნებლურ საქმიანობას“ ეწევა.

„მოსკოვის დასჯის მცდელობა - აშშ-ის 2016 წლის არჩევნებში სავარაუდო ჩარევისთვის მისთვის სანქციების დაწესება - უსაფუძვლო, სასაცილო და აბსურდულია", განაცხადა დერიპასკამ. 

ოლეგ დერიპასკა, რომელიც მოსკოვის უნივერსიტეტში ფიზიკის ფაკულტეტზე სწავლობდა, საბჭოთა კავშირის დაშლის შემდეგ, ლითონებით ვაჭრობაში ჩაერთო და  ალუმინის ქარხნებში წილების შეძენით გამდიდრდა. 
2000 წელს, დერიპასკამ RUSAL-ი (RUAL.MM) დააარსა და საბჭოთა  კავშირის მიერ წარმოებული ალუმინისგან დამზადებული სამკაულების საწარმო ერთ ჰოლდინგად გააერთიანა. Forbes-ის რუსული ვერსიით, 2023 წელს დერიპასკა რუსეთში 54-ე უმდიდრეს ადამიანად ($2,5 მილიარდი) დასახელდა. დერიპასკა Rusal-ის წილს კვლავ ფლობს.