მედიის ცნობით, დაზვერვის სამსახურს არ გამოუქვეყნებია კონკრეტული ქვეყნების ან პოლიტიკოსების სია, თუმცა ანგარიშში ნათქვამია, რომ ეს ქვეყნები ოთხ კონტინენტს მოიცავს.

აშშ-ის პრეზიდენტის ადმინისტრაციაში განაცხადეს, რომ აღნიშნული თანხა მხოლოდ „აისბერგის ზედა ნაწილია“ და სავარაუდოდ რუსეთი საიდუმლოდ ახორციელებდა დამატებითი თანხების გადარიცხვებსაც. პრეზიდენტის ადმინისტრაციის წარმომადგენელმა, რომლის სახელი არ სახელდება, აღნიშნა, რომ ამჟამად დაზვერვის სამსახური ინფორმაციას აწვდის იმ ქვეყნებს, სადაც რუსეთი საიდუმლო დაფინანსებას ახორციელებდა.

მისივე ცნობით, რუსეთმა დაახლოებით 500 ათასი დოლარი დახარჯა ალბანეთში ცენტრისტული დემოკრატიული პარტიის დასაფინანსებლად 2017 წელს და ასევე აფინანსებდა პარტიებს ბოსნიაში, მონტენეგროსა და მადაგასკარში. გარდა ამისა, კრემლი ბრიუსელს იყენებდა სხვადასხვა ფონდის შესაქმნელად, საიდანაც ახდენდა ულტრამემარჯვენე კანდიდატების მხარდაჭერას. ანგარიშიდან ცნობილი გახდა, რომ ფიქტიური კომპანიები გამოიყენებოდა ევროპული პარტიების დასაფინანსებლად და სხვადასხვა ქვეყანაში გავლენის მოსაპოვებლად.

როგორც „ბიბისი“ წერს, რუსულ მხარეს აღნიშნულთან დაკავშირებით ჯერ კომენტარი არ გაუკეთებია. მანამდე კი, მოსკოვმა არაერთხელ დაადანაშაულა აშშ, კერძოდ, ცენტრალური სადაზვერვო სააგენტო სხვა ქვეყნების საშინაო საქმეებში ჩარევაში.