ჩუბინაშვილის სახელობის ხელოვნების ისტორიის და ძეგლთა დაცვის ეროვნული კვლევითი ცენტრი კულტურის სამინისტროს მიერ გავრცელებულ განცხადებას ეხმაურება და ამბობს, რომ ის იურიდიულად გაუმართავ, უსაფუძვლო ბრალდებებსა და მრავალ შეცდომას შეიცავს, რომელთა მიზანი ცენტრის დისჯრედიტაციაა.

კვლევითი ცენტრი ასევე აღნიშნავს, რომ სამინისტრო "უკადრისი მეთოდებით" ებრძვის მათ. ცენტრის თქმით, მათი მაღალი სამეცნიერო რეპუტაცია და მტკიცე მოქალაქეობრივი პოზიცია კარგად არის ცნობილი სახელმწიფოსთვისაც და საზოგადოებისთვისაც.

"დღეს დილით კულტურის, სპორტისა და ახალგაზრდობის სამინისტრომ თავისი ფეისბუკის გვერდის მეშვეობით გაავრცელა განცხადება გ. ჩუბინაშვილის სახელობის ეროვნული კვლევითი ცენტრის საქმიანობის შესახებ.  აღნიშნულია, რომ განცხადება ეფუძნება სამინისტროს აუდიტის სამსახურის მიერ 2023 წლის თებერვალ-აპრილში გ. ჩუბინაშვილის ცენტრში ჩატარებული აუდიტორული შემოწმების ძირითად შედეგებს. 
განცხადება შეიცავს მრავალ შეცდომას და იურიდიულად გაუმართავ უსაფუძვლო ბრალდებებს, რომელთა მიზანია  გ. ჩუბინაშვილის სახელობის ეროვნული ცენტრის შეურაცხყოფა და დისკრედიტაცია. დასანანია, რომ სამინისტრო ასეთი უკადრისი მეთოდებით ებრძვის მასზე დაქვემდებარებულ კვლევით ცენტრს, რომლის მაღალი სამეცნიერო რეპუტაცია და მტკიცე მოქალაქეობრივი პოზიცია კარგად არის ცნობილი ჩვენი სახელმწიფოსთვისაც და საზოგადოებისთვისაც.
გ. ჩუბინაშვილის სახელობის ეროვნული კვლევითი ცენტრი უახლოეს დღეებში გააცნობს საზოგადოებას დეტალურ დასაბუთებულ პასუხს სამინისტროს განცხადებაში გამოთქმულ ბრალდებებზე", აღნიშნულია ცენტრის განცხადებაში.

ცნობისთვის, დღეს დილით კულტურის, სპორტისა და ახალგაზრდობის სამინისტრომ  გ. ჩუბინაშვილის სახელობის ეროვნული კვლევითი ცენტრის საქმიანობის შესახებ განცხადება გაავრცელა.

უწყების განცხადებით, შიდა აუდიტორული შემოწმების ძირითადი შედეგები მოწმობს, რომ კვლევითი ცენტრი, უკვე მრავალი წელია, იმართება "მრავლობითი კანონდარღვევების ფონზე" და მას, მმართველობის მხრივ, "სისტემური პრობლემები" აქვს.

ამას გარდა, კულტურის სამინისტროს განცხადებით, "გამოვლინდა კვლევითი ცენტრის მიერ საბიუჯეტო თანხების კანონშეუსაბამო, არაეკონომიური და არაეფექტური ხარჯვის შემთხვევებიც."