„ასევე, გრიგოლ რობაქიძის ლექსი, ანა ახმატოვას, ლესია უკრაინკას და სხვების ლექსები. შესაბამისად, ეს ძალიან მნიშვნელოვანი ხარვეზია. ვფიქრობ, ეს არ არის იმ ტიპის ხარვეზი ან შეცდომა, რომელსაც შეიძლება, უბრალოდ, ე.წ. სტიკერი დავაკრათ, რაზედაც თავიდან ვფიქრობდი კიდეც, რომ შეიძლებოდა, ყოფილიყო მისაღები. არც იმას დავმალავ და ამაზე საჯაროდ პირველად ვსაუბრობ, რომ ვერც დავიჯერე, რომ ამგვარი შეცდომების კასკადი შეიძლებოდა, ერთ წიგნში ყოფილიყო. მით უმეტეს, ისეთი რესპექტაბელური ორგანიზაციის ხელში შექმნილ წიგნში, როგორიც ლიტერატურის მუზეუმია, მაგრამ რეალობა, ფაქტი ჯიუტია და ვერსად გავექეცით. ამიტომ ჩაითვალა, რომ კულტურის სამინისტროს და სახელმწიფოს სახელი ვერ ექნებოდა ამ წიგნს. შესაბამისად, ეს ტირაჟი შესაბამისმა ორგანიზაციამ დააბრუნა დონორთან, ანუ კულტურის სამინისტროსთან და თანხის დამატება მოითხოვა, რაც არ უნდა უცნაური იყოს. ბატონმა ლაშა ბაქრაძემ „მერე რა მოხდა“ მიდგომა იქონია და თქვა, ნუ, ასეთი შეცდომები იპარება, რა ვქნათ, მოდით, დაგვიმატეთ თანხა და ჩვენ გამოვცემთ ახალ წიგნსო“, - განაცხადა თეა წულუკიანმა.

წულუკიანის თქმით, სამინისტროს მხრიდან ახალი წიგნის გამოსაცემად თანხის თავიდან გაცემაზე უარი ითქვა.

თეა წულუკიანმა, ასევე, განაცხადა, რომ ლიტერატურის მუზეუმს ბოდიში აქვს მოსახდელი დარიანის, მით უმეტეს, ანა კალანდაძის, რობაქიძის და სხვა ავტორების წინაშე და არა სამინისტროს წინაშე.

„თავად სიპ-ის უფროსთან საუბარი ვერ მოხერხდა, ვინაიდან მან გვითხრა, რომ ავად არის, მოიმიზეზა კოვიდი და როდესაც ეს პერიოდი დასრულდება, შემდეგ ჩვენ ვგეგმავთ სერიოზულ განხილვას“, - აღნიშნა თეა წულუკიანმა.

გადაცემის წამყვანის შეკითხვაზე, რა ტიპის იქნება განხილვა და იგულისხმება თუ არა განხილვაში სერიოზული პასუხისმგებლობის დაყენებაც, თეა წულუკიანმა განაცხადა, რომ განხილვას მოსდევს ან არ მოსდევს პასუხისმგებლობა.

„განხილვას მოსდევს ან არ მოსდევს პასუხისმგებლობა. ეს ჯერ არავინ არ იცის. განხილვა ჯერ არ დაწყებულა და ამიტომ, ეს ყვირილიც არის ნაადრევი. ყველამ უნდა დაზოგოს საკუთარი ენერგია, იმიტომ, რომ განხილვა ჯერ არ დაწყებულა. განხილვას შეიძლება, მოჰყვეს პასუხისმგებლობა და შეიძლება, არ მოჰყვეს, მაგრამ განხილვის შინაარსი, ანუ სერიოზული განხილვა გულისხმობს იმის კვლევას, თუ რა მეთოდით იქნა ეს წიგნი შედგენილი, რა იყო ფონდებში, საიდანაც ეს ხელნაწერები იქნა მათ მიერ ამოღებული და წიგნში შეტანილი, შესაძლებელი იყო თუ არა ამ შეცდომის თავიდან აცილება, რა უნდა გააკეთოს ლიტერატურის მუზეუმმა იმისთვის, რომ ამგვარი შეცდომა მომავალში არ იქნეს დაშვებული და ა.შ.“ - განაცხადა წულუკიანმა.

მაკა ცინცაძის შეკითხვაზე, როგორი იქნება მისი პოზიცია, თუ ლიტერატურის მუზეუმი მოახერხებს ამ წიგნის მათ მიერ მოძიებული თანხით გამოცემას, თეა წულუკიანმა განაცხადა, რომ ის ქართულ ბაზარზე ყველანაირი წიგნის გამოცემას მიესალმება, თუ ამ წიგნში ასეთი შეცდომები არ იქნება დაშვებული, განზრახ, ან უნებლიეთ.

„დაუშვებელია, თქვა, რომ ანა კალანდაძის ლექსი ეკუთვნის სხვას და დაუშვებელია აღშფოთდე, როცა შეცდომაზე მიგითითებენ. ალბათ, ასევე მნიშვნელოვანია, ლიტერატურის მუზეუმმა აწარმოოს ყველა მოსაზრების, ანუ განსხვავებული აზრის მქონე დარგის პროფესიონალების დისკუსია დიალოგი, რადგან ბევრი მათგანი ფიქრობს, რომ ლიტერატურის მუზეუმს უკვე ჩვევად ექცა, ელენე დარიანს მიაწეროს მაგალითად, პაოლო იაშვილის ლექსები ან ახლა უკვე, ანა კალანდაძის, გრიგოლ რობაქიძის, ანა ახმატოვას და სხვების ლექსები. ვფიქრობ, ეს დაუშვებელია, ეს უნდა გასწორდეს და განხილვა შედგეს, რომ მომავალში ამგვარი შეცდომები არ დაუშვას სახელმწიფო ორგანიზაციამ, რომელსაც პირიქით, მწერლებზე, მათ საავტორო უფლებებზე ზრუნვა და მათი ხსოვნის პატივისცემა ევალება“, - განაცხადა თეა წულუკიანმა.