ტერორიზმისა და შეთქმულების მუხლებით მიმდინარე გამოძიების ფარგლებში, სახელმწიფო უსაფრთხოების სამსახურში მოწმეთა გამოკითხვა გრძელდება.

უწყებაში გამოსაკითხად უკვე შევიდნენ ალი ხანგოშვილი და გიორგი კუშტანაშვილი. მათ მედიის კითხვებს არ უპასუხეს და უარყვეს აღნიშნულ საქმესთან რაიმე ტიპის შემხებლობა. მათივე თქმით, არ აქვთ ინფორმაცია, რატომ შეიძლებოდა, დაებარებინათ სახელმწიფო უსაფრთხოების სამსახურში.

ტერორიზმისა და შეთქმულების მუხლებით მიმდინარე საქმესთან დაკავშირებით, მას შემდეგ, რაც აქტიური საგამოძიებო მოქმედებები დაიწყო, მოწმის სტატუსით უკვე გამოიკითხა 15-ზე მეტი პირი. გამოკითხვები ერთ კვირაზე მეტია, გრძელდება და გამოკითხულთა ნაწილმა პროცესი მაგისტრი მოსამართლის წინაშე, საქალაქო სასამართლოში გაიარა. გამოკითხულთა შორის არიან როგორც უკრაინაში მებრძოლი ქართველები, ასევე ბიზნესმენები. იქიდან გამომდინარე, რომ საქმეს გრიფი ადევს, დეტალები უცნობია, თუმცა არ არის გამორიცხული, რომ გამოსაკითხ პირთა წრე კიდევ უფრო გაიზარდოს.

სახელმწიფო უსაფრთხოების სამსახურში მიმდინარეობს გამოძიება ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე, დანაშაული გათვალისწინებული საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით. სუს-ში აცხადებენ, რომ უწყება იძიებს უკრაინაში მყოფი საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებითა და დაფინანსებით საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტებს.