ბინების შესახებ კანონი „ინვესტორებს კი არა, არამედ აფხაზეთის მაცხოვრებლებს სჭირდებათ“, - განაცხადა ოკუპირებული რესპუბლიკის დეფაქტო ლიდერმა ასლან ბჟანიამ რუსულ მედიასთან ინტერვიუში.

„რატომ ხდება, რომ პატარა დუბაიში მშვიდად ყიდიან ბინებს უცხოელებზე და არავინ ყვირის იქ კოლონიზაციაზე? აფხაზეთში საცხოვრებლის უცხოელ მფლობელს აქვს მხოლოდ ამ საცხოვრებლის ფლობის უფლება - და სხვა არაფერი. 70 000 ადამიანი გვყავს უმუშევარი. მათთვის სამუშაო ადგილების შესაქმნელად საჭიროა 400 მილიარდი რუბლის ინვესტიცია აფხაზეთის ეკონომიკაში, მაგრამ ჩვენი წლიური ბიუჯეტი მხოლოდ 14 მილიარდია. როგორც რუსი, ისე აფხაზი ბიზნესმენები რუსეთის ფედერაციასა და თურქეთში მზად არიან დააფინანსონ ეს ამბავი. სამშენებლო სამუშაოების ეტაპზეც კი სახელმწიფო დიდ ფულს შოულობს, ჩნდება სამუშაო ადგილები, მაღაზიები, რესტორნები, ვითარდება სოფლის მეურნეობა. თუ 30 000 ოთახი აშენდება, ეს ეკონომიკაში 400 მილიარდ რუბლს მოიზიდავს“, - აღნიშნა მან.

ბჟანიას თქმით, სახელმწიფო არაფერს რისკავს, „ბიზნესმენები ყველა რისკს იღებენ“.

„ყველაზე მნიშვნელოვანი ის არის, რომ მე ვერასდროს გავბედავ რუსეთის მოქალაქეებს ვუწოდო აფხაზეთის კოლონიზაციის უნარის მქონე ადამიანები. ეს ჩემი პოლიტიკური ოპონენტების ტერმინია. აფხაზეთის ყოფილი ლიდერი ამბობს, რომ სტალინის დროს ქართველები აქ ზუსტად ასე ჩამოასახლეს. მაგრამ ის დუმს, რომ ქართველები უცხოელები არ იყვნენ, მათ ჰქონდათ სსრკ-ს მოქალაქეების ყველა მაშინდელი უფლება. როგორ შეგვიძლია შევადაროთ მათ ჩვენი უახლოესი მოკავშირე? რუსეთის ფედერაცია გვიშენებს საავადმყოფოებს, მუზეუმებს, სკოლებს და აღადგენს ჩვენს ისტორიულ მეხსიერებას. ეს ბრძოლა არის სპეცსამსახურების ქმედებები, რომელთა მიზანია ჩვენი ურთიერთობების გაფუჭება“, - დასძინა ბჟანიამ.
აფხაზეთის ლიდერი ამბობს, რომ აფხაზეთში ბინები „დღეს ისევ შენდება და იყიდება ყველგან“.