საქსტატის წინასწარი მონაცემებით, 2023 წლის პირველ კვარტალში საქართველოში 496.6 მლნ აშშ დოლარის პირდაპირი უცხოური ინვესტიციები განხორციელდა, რაც წინა წლის ანალოგიურ პერიოდთან შედარებით 13.7%-ით ნაკლებია, ხოლო 2022 წლის IV კვარტლის მონაცემებს 53.3 პროცენტით აღემატება.

ქვეყნების მიხედვით, საქართველოში ყველაზე მეტი ინვესტიცია ნიდერლანდებიდან განხორციელდა, საიდანაც 239.6 მილიონი ჩაიდო. ამ ქვეყნიდან შემოსული ინვესტიციების მოცულობა 630%-ით არის გაზრდილი. მეორე ადგილზეა იაპონია 63 მილიონის საინვესტიციო ნაკადით, ამ ქვეყნიდან შემოსული FDI პირველ კვარტალში 700%-ით არის გაზრდილი.

ქვეყნები, საიდანაც პირველ კვარტალში ყველაზე მეტი FDI შემოვიდა:

1. ნიდერლანდები - 239.6 მილიონი დოლარი, ზრდა წინა წელთან 630%
2. იაპონია - 63.2 მილიონი დოლარი, ზრდა წინა წელთან 700%
3. აშშ - 54.7 მილიონი დოლარი, ზრდა წინა წელთან 70%
4. თურქეთი - 47 მილიონი დოლარი, კლება წინა წელთან -28%
5. რუსეთი - 28.2 მილიონი დოლარი გასულ წელს რუსეთიდან მინუს 11 მლნ-ის ინვესტიციები დაფიქსირდა
6. მარშალის კუნძულები - 23.7 მილიონი დოლარი, ზრდა წინა წელთან 30%
7. ყაზახეთი - 20 მილიონი დოლარი, ზრდა წინა წელთან 953%
8. ჩინეთი - 19.9 მილიონი დოლარი, კლება წინა წელთან -46%
9. დანია - 11.1 მილიონი დოლარი, ზრდა წინა წელთან 28%
10. შვეიცარია - 10.3 მილიონი დოლარი, ზრდა წინა წელთან 39%.

შემოსულ FDI-ს შორის 300 მილიონი დოლარი სააქციო კაპიტალში განხორციელებული ინვესტიციები იყო, რეინვესტიციები 190 მილიონი დოლარი, ხოლო სავალო ვალდებულებების ჩამორიცხვა 7 მილიონი დოლარი.

2023 წლის I კვარტალში ყველაზე მეტი პირდაპირი უცხოური ინვესტიცია დამამუშავებელი მრეწველობის სექტორში განხორციელდა და 226.3 მლნ. აშშ დოლარი შეადგინა, რაც მთლიანი პირდაპირი უცხოური ინვესტიციების 45.6 პროცენტია. მეორე ადგილს იკავებს ვაჭრობის სექტორი - 90.7 მლნ. აშშ დოლარით (18.3 პროცენტი), ხოლო მესამეზე იმყოფება ტრანსპორტის სექტორი 43.3 მლნ. აშშ დოლარით (8.7 პროცენტი).